О́tken aptada Astanada Úndistandaǵy «Prasar Bharati» memlekettik habar taratý agenttiginiń bas dırektory Gaýrav Dvıvedı bastaǵan delegasııa bir top jýrnalıspen kezdesti. Basqosýdyń basty maqsaty – osy jyly 1-4 mamyr aralyǵynda Mýmbaı qalasynda ótetin Álemdik aýdıovızýaldy jáne oıyn-saýyq sammıti (WAVES) jaıynda málimet berý.
WAVES – medıa jáne oıyn-saýyq (M&E) salasyn biriktiretin biregeı platforma. Onyń maqsaty – Úndistandaǵy medıa jáne oıyn-saýyq ındýstrııasyna jahandyq nazar aýdarýdy jáne osy sektorda úndistandyq talanttardyń sheteldik áriptesterimen baılanys ornatýyn maqsat etetin jetekshi halyqaralyq forým. Búginde M&E ındýstrııasy jedel qarqynmen damyp keledi. Byltyr onyń álemdik naryǵy shamamen 2,96 trln dollarǵa jetken. Al Úndistannyń M&E ındýstrııasy 2029 jylǵa qaraı 50 mlrd dollarǵa jetýi múmkin.
G.Dvıvedı qazaqstandyq jýrnalıstermen kezdesýinde WAVES sammıti medıa jáne oıyn-saýyq sektorynyń damýyna serpin berý úshin túrli elden kelgen ulttyq delegasııalardy, jahandyq jáne úndistandyq sala kóshbasshylaryn, saıasatkerlerdi, ındýstrııa ókilderin jáne jańashyldardy bir alańǵa jınaıtynyn jetkizdi. Qazaqstannyń medıa salasy mamandaryn da osy sammıtke belsendi qatysyp, ózara tájirıbe almasýǵa shaqyrdy.
«Munda salanyń bolashaǵy, múmkindikteri men syn-qateri talqylanady. Jahandyq M&E sektory kıno, teledıdar, radıo habar taratý, baspasóz, jańalyqtar, jańa medıa, jarnama, anımasııa, vızýaldy effektiler (VFX), oıyndar men kıbersport, tolyqtyrylǵan/vırtýaldy/keńeıtilgen shynaıylyq (AR/VR/XR), mýzyka jáne basqa da salalardy qamtıdy», dedi ol.
Medıa mamanynyń sózinen uqqanymyz, búginde jedel qarqynmen damyp kele jatqan Úndistannyń M&E ındýstrııasynda da aldyna qoıyp otyrǵan maqsaty zor. Atap aıtqanda, Úndistandy jahandyq kontent ortalyǵy retinde qalyptastyrý jáne kontent eksporttaýshysyna aınaldyrý, Úndistannyń ártúrli mádenı murasyn qamtıtyn baı zııatkerlik menshik ekojúıesin qurý, úndi medıasynyń jahandyq naryqtaǵy úlesin arttyrý, óz elderin iri jahandyq ınvestısııalyq naryq retinde qalyptastyrýdy kózdeıdi. Sonymen qatar úndi jáne halyqaralyq seriktesterdiń strategııalyq áriptestikteri men yntymaqtastyqtaryn damytý, naryqty keńeıtý, birlesken kontent óndirý jáne ózara tolyqtyratyn múmkindikterdi paıdalaný syndy úlken maqsaty bar.
G.Dvıvedı WAVES múmkindikterin paıdalaný qaı memleketke bolsyn paıdaly ekenin aıtady. Máselen, qazaqstandyq madıa mamandary da jahandyq naryqtarǵa jáne aýdıtorııalarǵa shyǵý arqyly jańa iskerlik baılanystardy ornatýǵa jáne Craft2Commerce (ónerden bızneske) transformasııasyna yqpal etýge, áriptestik pen yntymaqtastyq ornatý arqyly bıznestiń ósýine, bilim almasý jáne úzdik tájirıbelerdi engizý arqyly salanyń tıimdiligin arttyrýǵa, jahandyq ındýstrııa kóshbasshylarymen baılanys ornatýǵa, basqa da múmkindikterge qol jetkizbek. Sonymen qatar WAVES sammıti aıasynda baıqaýlar men kórmeler, iskerlik kezdesýler, t.b. is-sharalar ótedi.