Qarýly kúshter Ulttyq áskerı-patrıottyq ortalyǵynyń Áskerı-tarıhı murajaıynda Ekinshi dúnıejúzilik soǵys jyldarynda urys dalasynda qaza tapqan jaýyngerlerdiń týystaryna «Erligi, boryshyna adaldyǵy úshin» medali tabystaldy.
Is-sharaǵa ardagerler uıymdarynyń, «Jas sarbaz» áskerı-patrıottyq qozǵalysynyń ókilderi jáne qyzyláskerlerdiń urpaqtary qatysty.
«Memorıaldyq aımaq» qoǵamdyq birlestiginiń marapaty maıdanda qaza tapqan jaýyngerlerdiń balalary men nemerelerine tabystaldy. Uıymdy professor, Qazaqstannyń eńbek sińirgen qurylysshysy Maıdan Qusaıynov basqarady. Ol kóp jyldan beri Sankt-Peterbýrg mańyndaǵy Sınıavın batpaqtary men bıiktikterde qaza tapqan jaýyngerlerdi izdestirýge qatysyp keledi. Onyń izdestirý jasaǵy Aqmola men Petropavlda qurylǵan 310 jáne 314-atqyshtar dıvızııalarynyń quramynda soǵysqan júzden asa qazaqstandyq jaýyngerdiń qabirin izdep tapty.
Atalǵan is-sharaǵa qyzylásker Qalmen Taıshybaevtyń 85 jastaǵy qyzy ákesiniń nagradasyn alýǵa uldarymen birge kelipti.
– Ol maıdanǵa ketkende men nebári bir jarym jasta ekenmin. Sińlim ákem ketkennen keıin kóp uzamaı dúnıege kelipti. Biz ony kórgen joqpyz. Búgin men – 14 nemere men jıyrmadan asa shóbere súıip otyrǵan ájemin. Áýletimizdiń atynan Maıdan Kómekulyna izdeý jasaǵynyń jumysy úshin zor alǵysymdy bildirgim keledi. Bul týystarynan aıyrylǵan jáne olardyń taǵdyrynan habarsyz otbasylar úshin óte mańyzdy, – dedi Aqnur Taıshybaeva.
Aǵaıyndy Bıahmet pen Slám Raqymbaevtar soǵystyń alǵashqy kúnderi maıdanǵa attanǵan. Olardyń nagradasy Gúlnar Bıahmetovanyń nemeresine tabystaldy. Is-sharaǵa ol ápkesi Elmıramen jáne uldarymen birge keldi.
– Bizdiń atamyz Bıahmet Raqymbaev 1908 jyly Shyǵys Qazaqstan oblysy, Tarbaǵataı aýdany, Mańyraq aýylynda dúnıege kelgen. Ol Dneprde soǵysyp, Doneskini azat etýge qatysqan. Lenıngradty qorǵap, Kýrsk shaıqasyna qatysty. 1943 jyly Ýkraınada erlikpen qaza tapty. 1911 jyly týǵan ekinshi atamyz Slám Raqymbaev Jeńisti Berlınde qarsy alǵan eken. Úıge qaıtyp kele jatqanda banderovshilerdiń qolynan qaza tapqan. Bizdiń atalarymyz Jeńis úshin óz ómirlerin qurban etti. Jastar muny árdaıym este ustaýy kerek, – dedi Gúlnar Bıahmetova.
Bul is-sharanyń urpaqtar sabaqtastyǵyn nyǵaıtýdaǵy mańyzdylyǵyn «Jas sarbaz» áskerı-patrıottyq qozǵalysy» RQB elorda fılıalynyń tóraǵasy Ashat Nalshybek te atap ótti. Ol sondaı-aq izdeýshilerge soǵys maıdandarynda qaza tapqan jaýyngerlerdi esimin este qaldyrýǵa qosqan baǵa jetpes úlesi úshin alǵys aıtty.