Byltyr sıfrlyq pasporttaý jalpy uzyndyǵy 5 myń shaqyrymnan asatyn Astana, Atyraý qalalary men Atyraý oblysynyń joldaryn qamtydy. Bıyl ortalyq jáne ońtústik óńirlerdiń joldaryn sıfrlandyrý josparlanyp otyr. Sıfrlyq pasporttaý – joldyń ár telimi týraly aqparatty jınaý, óńdeý men saqtaý júıesi, uzyndyǵy, jabyny, sanaty, tańbalaýdyń bolýy jáne basqa ınfraqurylymdyq elementter sııaqty parametrlerdi qamtıdy.
Arnaıy jyljymaly zerthana derekterdi jınaıtyn joǵary dáldiktegi kameralarmen, sondaı-aq sensorlarmen jabdyqtalǵan.
«Jol jelilerin basqarý júıesi joldar men ınfraqurylym týraly derekterdi saqtap qana qoımaı, joldardyń jaı-kúıi men qaýipsizdigin dıagnostıkalaýǵa, baǵalaýǵa múmkindik beredi. Mysaly, júıede Astanadaǵy kósheler boıyndaǵy aǵashtardyń sanyn bilýge nemese shekaralardyń uzyndyǵyn esepteýge bolady», deıdi «QazjolǴZI»-diń resmı ókili Adına Aınaeva.
Mamandar jol jelisindegi ózgeristerdi esepke alý úshin únemi tekserip otyrý qajet ekenin aıtady. Mysaly, Astanada qaıta pasporttaý jeti jylda joldardyń uzyndyǵy 869 km-den 1 145 km-ge deıin ulǵaıǵanyn anyqtady.
Sıfrlyq pasporttaý engizilgen alǵashqy qalalardyń biri Aqtóbe boldy. Munda joldardy sıfrlandyrý jergilikti bılikke, joldarǵa qyzmet kórsetýge qarajat jetispeýshiligi máselesin sheshýge kómektesti. Adına Aınaeva derekterdiń qarapaıym tapshylyǵy qys mezgilinde joldardyń tıisti kútimin qamtamasyz etýge múmkindik bermegenin atap ótti.
«Derekterdi túzetip, joldardyń naqty uzyndyǵy men túrine sáıkes bıýdjetti qaıta bólgennen keıin Aqtóbe magıstraldyq kóshelerge de, turǵyn alaptardaǵy joldarǵa da qyzmet kórsetý úshin qarajatty dálirek bóle aldy. Bul qarajat tapshylyǵyn boldyrmaýǵa jáne ótken maýsymda joldarǵa sapaly qyzmet kórsetýge múmkindik berdi. Túzetýdiń nátıjesinde tehnıkany jańartyp, jabdyqtar men materıaldardy jetkilikti mólsherde satyp alýǵa múmkindik týdy», dedi resmı ókil.
Sıfrlyq pasporttaýdy engizý – elimizdiń jol ınfraqurylymyn sıfrlandyrý men reformalaýdaǵy mańyzdy qadam. Jol derekterin dál esepke alý jáne únemi jańartyp otyrý bıýdjet qarajatyn tıimdi paıdalanýǵa, ózgeristerge ýaqtyly jaýap berýge jáne joldarǵa qyzmet kórsetý sapasyn arttyrýǵa jaǵdaı jasaıdy.