Premer-mınıstrdiń orynbasary – Ulttyq ekonomıka mınıstri Serik Jumanǵarın Dúnıejúzilik bank ókilderimen kezdesý ótkizdi.
Jıynǵa Ortalyq Azııa boıynsha óńirlik dırektor Tatıana Proskýrıakova, Shyǵys Eýropa jáne Ortalyq Azııa úshin ınfraqurylym jónindegi óńirlik dırektor Charlz Korme, Qazaqstandaǵy Dúnıejúzilik banktiń turaqty ókili Andreı Mıhnev, sondaı-aq Qazaqstan, Qyrǵyzstan jáne Tájikstan boıynsha HQK óńirlik menedjeri Zafar Hashımov qatysty.
Kezdesýdiń basty taqyryby – Qazaqstanmen 2026–2030 jyldarǵa arnalǵan áriptestiktiń jańa strategııasy, Áriptestik týraly negizdemelik kelisimdi (ÁNK) ratıfıkasııalaý, taldamalyq qoldaýdy keńeıtý jáne birlesken jobalardy iske asyrý. Serik Jumanǵarın Qazaqstan Dúnıejúzilik bankpen yntymaqtastyqtyń strategııalyq sıpatyn joǵary baǵalaıtynyn aıtyp, qurylymdyq reformalardy iske asyrýda jáne ınklıýzıvti ekonomıkalyq ósýdi qamtamasyz etýde áriptestiktiń mańyzdylyǵyn atap ótti.
«Elimiz úshin ekonomıkany ártaraptandyrý, ınvestısııa tartý, ınfraqurylymdy damytý jáne negizgi salalardy jańǵyrtý basym mindetter bolyp qala beredi. 2025 jyly IJО́ ósimi 5,6%-dan joǵary bolýǵa tıis. Bankpen birlesken bastamalar ornyqty ekonomıkalyq damýǵa qol jetkizýge kómektesedi», dedi vıse-premer.
Jıyn barysynda Dúnıejúzilik bankpen qazirgi jáne keleshektegi jobalar talqylandy. Olar: Qambarata GES-1 qurylysy, Jezqazǵan – Qaraǵandy jobasy, avtojoldardy jańǵyrtý, ónimdi ınnovasııalardy yntalandyrý jáne ǵylym men tehnologııany damytý, Soltústik Aral teńizi jobasy, energetıkalyq jáne kommýnaldyq sektordy jańǵyrtýdy qoldaý jáne taǵy basqalar. Dúnıejúzilik banktiń Ortalyq Azııa boıynsha óńirlik dırektory Tatıana Proskýrıakova uıymnyń damý salasyndaǵy eń iri halyqaralyq qurylym bolyp sanalatynyn jáne ondaǵan memleketpen jumys isteıtinin aıtty. Onyń sózinshe, Qazaqstandaǵy jobalar portfeli 2,5 mlrd dollardy quraıdy.
«Áriptestik týraly negizdemelik kelisimdi ratıfıkasııalaý úderisin aıaqtaýdy usynamyz. Osyǵan uqsas ýaǵdalastyqty basqa da halyqaralyq ınstıtýttar qoldanýda. Bul birlesken jobalardy júzege asyrý úshin jańa múmkindik týǵyzady. Biz dıalogke ashyqpyz ári Qazaqstandy onyń strategııalyq maqsattaryna qol jetkizýde qoldaýǵa daıynbyz», dedi ol.