Oral qalasynda toǵyzqumalaqtan jastar men ıýnıorlar arasyndaǵy Qazaqstan Respýblıkasynyń chempıonaty bastaldy, dep habarlaıdy Egemen.kz.
Saıys sáýir aıynyń 3-ine deıin sozylady. Jarysqa elimizdiń úsh qalasy men 17 oblysynan 400-den astam sportshy qatysýǵa nıet bildirgen.
«Chempıonattyń basty maqsaty – toǵyzqumalaq oıynyn nasıhattap, ony damytý, sondaı-aq salaýatty ómir saltyn nasıhattaý. Bul jarys jas sportshylardy biriktirip, olardyń sheberlik deńgeıin arttyrýǵa, bolashaq chempıondardy anyqtaýǵa jol ashady», deıdi saıysty uıymdastyrýshy Batys Qazaqstan oblysy dene shynyqtyrý jáne sport basqarmasynyń basshysy orynbasary Mırbolat Nurjanov. Onyń aıtýynsha, jarystyń joǵary deńgeıde ótýine barynsha jaǵdaı jasalǵan.
Respýblıkalyq chempıonatty uıymdastyrýshylar men tórelik etýshiler qatarynda Toǵyzqumalaqtan QR memlekettik jattyqtyrýshysy, QR-niń eńbek sińirgen jattyqtyrýshysy Dáýlet Ábdikárimov, Qazaqstan Respýblıkasy toǵyzqumalaq sporty federasııasynyń vıse-prezıdenti, QR-niń eńbek sińirgen jattyqtyrýshysy Maqsat Shotaev, Batys Qazaqstan oblysynyń toǵyzqumalaq federasııasynyń prezıdenti Muhtar Mánkeevter bar. Al jarystyń bas tóreshisi – ulttyq dárejedegi tóreshi Hákimjan Eleýsinov.
Chempıonatqa Astana, Almaty, Shymkent qalalarynan, Abaı, Aqmola, Aqtóbe, Almaty, Atyraý, Jambyl, Jetisý, Qaraǵandy, Qostanaı, Qyzylorda, Mańǵystaý, Pavlodar, Túrkistan, Ulytaý, Shyǵys Qazaqstan jáne Batys Qazaqstan oblystarynan komanda qatysady.
«Bul chempıonat jas sportshylar arasynda toǵyzqumalaq oıynynyń tanymaldylyǵyn arttyrýǵa, ony damytýǵa jáne elimizdegi sporttyq mádenıettiń deńgeıin kóterýge yqpal etedi. Jarys nátıjeleri men jeńimpazdary bolashaqta elimizdiń atyn shyǵaratyn myqty sportshylardy daıyndaýǵa óz úlesin qosatyny sózsiz», deıdi uıymdastyrýshylar.
Batys Qazaqstan oblysy