Keshe Senat spıkeri Máýlen Áshimbaevtyń tóraǵalyǵymen palata janyndaǵy Sarapshylar klýbynyń otyrysy ótip, onda Qazaqstan men Qytaı arasyndaǵy ózara is-qımyldyń negizgi aspektileri talqylandy. Sondaı-aq qatysýshylar túrli saladaǵy birlesken jobalardy iske asyrý jóninde usynystaryn aıtty. Klýb otyrysyna Qytaı Kommýnıstik partııasy Ortalyq Komıteti Halyqaralyq baılanystar bóliminiń meńgerýshisi Lıý Szıanchao meıman retinde qatysty.
Máýlen Áshimbaev bul kezdesýdiń Naýryz merekesi kezeńinde ótýi Qazaqstan men Qytaı arasyndaǵy qarym-qatynastardyń jańarǵanyn jáne sapaly deńgeıge kóterilgenin bildiretin rámizdik mánge ıe ekenin atap ótti. Sondaı-aq ol eki memlekettiń basshylary Prezıdent Qasym-Jomart Toqaev pen Tóraǵa Sı Szınpınniń kúsh-jigeriniń arqasynda ekijaqty dıalogtiń serpin alǵanyn aıtty.
«Keıingi 30 jylda Qazaqstan men Qytaı arasyndaǵy qarym-qatynas máńgi ári jan-jaqty strategııalyq seriktestiktiń buryn-sońdy bolmaǵan deńgeıine jetip, jańa tarıhı kezeń – «altyn otyz jyldyqqa» qadam basty. Eń aldymen, bul – bizdiń memleketterimizdiń basshylary arasyndaǵy tyǵyz jáne senimdi dıalogtiń nátıjesi. Elderimizdiń kóshbasshylary – Qazaqstan Prezıdenti Qasym-Jomart Toqaev pen Qytaı Halyq Respýblıkasynyń Tóraǵasy Sı Szınpınniń kúsh-jigeriniń arqasynda ekijaqty dıalog tyń serpinmen damyp keledi. Dástúrli baǵyttardan bólek, sıfrlyq tehnologııalar men jasandy ıntellekt salasy erekshe qyzyǵýshylyq týdyryp otyr. Biz osy baǵytta da ózara yntymaqtastyqty keńeıtýge múddelimiz», dedi M.Áshimbaev.
Otyrys barysynda sarapshylar kólik jáne logıstıka ınfraqurylymy, jańartylatyn energııa, bilim berý, mádenıet, týrızm salalaryndaǵy birlesken jobalarǵa nazar aýdardy. Búginde Qazaqstanda energetıka, agroónerkásip jáne munaı-gaz sektorlarynda osyndaı 5 myńǵa jýyq kásiporyn bar. Sondaı-aq bizdiń elde Konfýsıı ınstıtýttary, Qytaı ýnıversıtetteriniń fılıaldary jáne «Lý Ban sheberhanasy» tabysty jumys istep kele jatqany aıtyldy.
Klýb músheleri Senat janyndaǵy Taldaý mektebi aıasynda ózara baılanys ornatyp, halyqaralyq jobalar sheńberinde jáne saraptamalyq-taldamalyq yntymaqtastyq jelisi boıynsha Qazaqstan-Qytaı qarym-qatynasyn odan ári arttyrý jóninde óz usynystaryn bildirdi.
«Elderimiz arasynda saraptamalyq yntymaqtastyq ta erekshe mańyzǵa ıe. Senat delegasııasynyń Qytaıǵa sapary kezinde qytaılyq sarapshylarmen mazmundy jáne nátıjeli kezdesý ótkizdik. Bıyl Senat janyndaǵy Taldaý mektebine shaqyrylǵan dáriskerlerdiń qatarynda jasandy ıntellekt salasyndaǵy belgili sarapshy doktor Kaı-Fý Lı bolǵanyn erekshe atap ótken jón. Osylaısha, Qazaqstan-Qytaı qatynastary ekonomıka, qaýipsizdik, jańa tehnologııalar, mádenıet jáne saraptamalyq ózara is-qımyl salalaryn qamtyp, jańa deńgeıge kóterilip otyr», dedi Senat tóraǵasy.
Sonymen qatar qytaılyq meımannyń sapary aıasynda Máýlen Áshimbaev pen Lıý Szıanchaonyń ekijaqty kezdesýi ótti. Suhbat kezinde taraptar qazirgi tańda eki eldiń arasyndaǵy saıası dıalog pen parlamentaralyq yntymaqtastyq joǵary deńgeıde ekenine, sondaı-aq jahandyq jáne óńirlik kún tártibindegi mańyzdy máseleler boıynsha ustanymdardyń uqsastyǵyna nazar aýdardy.
«Bizdiń elimiz ádiletti jáne kóppolıarly álem qalyptastyrýdy kózdeıtin jahandyq bastamalardy árdaıym qoldaıdy. Qazaqstan Prezıdenti Qasym-Jomart Toqaev Qytaı Halyq Respýblıkasynyń Tóraǵasy Sı Szınpınniń «Adamzattyń birtutas taǵdyry qaýymdastyǵy» týraly ıdeıasynyń mańyzdy ekenin birneshe ret atap ótti. Qazirgi halyqaralyq jaǵdaıda bul ıdeıalar asa ózekti ekeni sózsiz. Qytaıdyń jahandyq damý jónindegi osyndaı bastamalary jalpyǵa birdeı qaýipsizdik pen beıbitshilikti qamtamasyz etýge aıtarlyqtaı úles qosady dep senemiz», dep M.Áshimbaev Lıý Szıanchaonyń Senat janyndaǵy Sarapshylar klýbynyń otyrysyna qatysyp, halyqaralyq kún tártibindegi ózekti máselelerdi talqylaýyn joǵary baǵalady.
О́z kezeginde Lıý Szıanchao qazaqstandyq tarapqa alǵys bildirip, Qazaqstan men Qytaı arasyndaǵy yntymaqtastyqty nyǵaıtýǵa arnalǵan birlesken jobalardy iske asyrýǵa múddeli ekenin jetkizdi.