Búgin senatorlar dene shynyqtyrý jáne sport máseleleri, sondaı-aq zańnamadaǵy artyq retteýdi alyp tastaýǵa qatysty zańdy qarady. Parlament Senatynyń Spıkeri Máýlen Áshimbaev osyǵan baılanysty sporttyń basym túrlerin anyqtaý parasportty qarjylandyrýǵa qalaı áser etetini jáne zańnamadaǵy jańa normalardyń parasportshylarǵa áseri jóninde suraq qoıdy, dep habarlaıdy Egemen.kz.
Máýlen Áshimbaev parasportshylar áleýmettik jelilerde qarjylandyrý máselesine qatysty alańdaýshylyq bildirgenin atap ótti. Ol qabyldanatyn kez kelgen sheshimniń saldaryn muqııat zerdeleý qajet ekenin aıtty. Eń aldymen, dene shynyqtyrý jáne sport máselelerine qatysty zań, sondaı-aq, zańnamadaǵy shamadan tys reglamentteýdi alyp tastaý parasportshylardyń múmkindikterin shektemeýge tıis ekenin tilge tıek etti. Osyǵan baılanysty Palata Spıkeri senatorlardy atalǵan máseleni baqylaýda ustaýǵa shaqyrdy.
Sonymen qatar Senat Tóraǵasy elimizde Paralımpıada baǵdarlamasyna kirmeıtin sport túrleriniń de nazardan tys qalmaýy kerektigin aıtty. Ol, ásirese, arbada otyryp bıleý sekildi tanymal sport túrlerin qoldaýdyń mańyzdylyǵyn atap ótti.
«Olardyń ishinde arbada otyryp bıleýmen aınalysatyn azamattarymyz bar. Bul – parasporttyń keń taralǵan túri. Sondyqtan Senattyń tıisti komıteti osy máseleni baqylaýda ustaıdy jáne bul zań olarǵa shekteý jasamaýy kerek. Parasporttyń basqa túrlerin qarjylandyrý da toqtap qalmaýy qajet. Bul – óte názik másele. Men sizdiń (Týrızm jáne sport mınıstrligi ókiliniń) oıyńyzdy túsinip otyrmyn. Árqashan basymdyqtar bolýy kerek, nazar aýdarý men qarjylandyrý turǵysynda naqty qaraǵan jón. Sonyń ishinde parasportqa asa muqııat bolýǵa tıispiz. Bul jerde biraz másele bar. Ári qaraı, quqyq qoldaný barysynda qarastyryp, qajet bolǵan jaǵdaıda zańnamany jetildiremiz. Keıbir máseleler zańnan keıingi aktilermen rettelýi múmkin», dedi Máýlen Áshimbaev Týrızm jáne sport mınıstriniń orynbasary Serik Jarasbaevqa.