Keshe Parlament Senatynyń Tóraǵasy, Álemdik jáne dástúrli dinder lıderleri Sezi Hatshylyǵynyń Basshysy Qasym-Jomart Toqaevtyń tóraǵalyq etýimen V Sezge ázirlik jáne ótkizý jónindegi memlekettik komıssııanyń otyrysy boldy. Sezd 2015 jylǵy 10-11 maýsymda Astanada ótedi jáne dinı kóshbasshylar men saıası qaıratkerlerdiń beıbitshilik jáne damý jolyndaǵy únqatysýyna arnalady.
Qazaqstan Prezıdenti N.Nazarbaev bastamashysy bolyp tabylatyn dinı forýmnyń mańyzy erekshe ekenine toqtalǵan Sezd Hatshylyǵynyń Basshysy Q.Toqaev «Bul forýmdy tıimdi jáne iskerlik turǵysynda ótkizýdi qarastyra otyryp, sharany joǵary deńgeıde uıymdastyrýdy qamtamasyz etý kerektigine» Memlekettik komıssııa músheleriniń nazaryn aýdardy.
Senat Tóraǵasy Sezdiń tujyrymdamalyq, ıdeologııalyq jáne saıası máseleleri týraly óz oılaryn ortaǵa saldy, sondaı-aq mekemelerdiń basshylaryna tapsyrmalar berdi. «Álemdik jáne dástúrli dinder lıderleriniń V Sezine ázirlik jáne ony ótkizý jónindegi sharalar jospary bekitildi. Qazirgi kezde osy jospardy iske asyrý jónindegi jumystar bastaldy. Osy isti uıymdastyrýǵa tartylǵan barlyq mınıstrlikter men mekemeler sharany tabysty ótkizý úshin tyǵyz baılanysta jáne jumyla árekettesýi kerek», dep atap ótti Q.Toqaev.
Álemdik jáne dástúrli dinder lıderleriniń V Sezin uıymdastyrý jónindegi atqarylǵan jumystar boıynsha Memlekettik komıssııanyń hatshysy, Parlament Senaty Apparatynyń basshysy A.Sýdın, Syrtqy ister mınıstri E.Ydyrysov, Mádenıet jáne sport mınıstri A.Muhamedıuly, Ishki ister mınıstri Q.Qasymov, Astana ákiminiń orynbasary E.Amanshaev sóz sóıledi, dep habarlady Senattyń baspasóz qyzmeti.