Úndistannyń Gýdjarat shtatyndaǵy petard shyǵaratyn zaýytta jarylys boldy, dep habarlaıdy Egemen.kz.
Jarylys saldarynan 18 adam qaza taýyp, taǵy birneshe adam jaraqat alǵan.
Zardap shekkenderdiń kópshiligi aýyr kúıik alǵandyqtan, qaza tapqandar sany artýy múmkin. Qutqarý jasaǵy onyń ishinde aýdan ákimdiginiń ókilderi men órt sóndirýshiler úıindi astynan máıitterdi shyǵaryp jatyr.
Buǵan deıin jergilikti bılik oqıǵa ornynan 13 máıit tabylǵanyn habarlaǵan edi.
«Nátıjesinde ǵımarattyń tóbesi túgel opyryldy. Oqıǵa ornynan 13 adamnyń máıiti shyǵaryldy. Úıindilerdi tazalaý jumystary júrgizilip jatqan kezde jaǵdaıdy baǵalaýdamyz. Tórt adam zardap shekti, onyń ekeýi Dısadaǵy azamattyq aýrýhanaǵa, qalǵan ekeýi Palampýrdaǵy azamattyq aýrýhanaǵa jóneltildi», delingen habarlamada.