Memleket basshysy qoıǵan mindetter aıasynda Ekologııa jáne tabıǵı resýrstar mınıstrligi Úkimet atynan josparly jumys júrgizip jatyr, dep habarlaıdy Egemen.kz.
Ekologııa jáne tabıǵı resýrstar mınıstri Erlan Nysanbaev atap ótkendeı, búginde respýblıkada materıaldyq-tehnıkalyq jabdyqtar jańartylyp, orman órt sóndirý tehnıkasy satyp alynǵan. Sondaı-aq órtti erte anyqtaý júıeleri engizilip jáne jańa orman tálimbaqtary qurylyp, erekshe qorǵalatyn tabıǵı aýmaqtar keńeıtilip, qaldyqtardy kádege jaratý jobalary júzege asyrylyp jatyr. Al sırek kezdesetin janýarlar – jolbarystar, qulandar jáne Prjevalskıı jylqylary tabıǵatqa qaıtarylady.
«Ormandardy qorǵaýdy kúsheıtý jáne materıaldyq-tehnıkalyq jańartý úshin ortalyq bıýdjetten órtke qarsy jáne orman órt sóndirý tehnıkasyn satyp alýǵa 5,4 mlrd teńge baǵyttaldy, jergilikti qurylymdardan 6,7 mlrd teńge bólindi. Orman órtterin tıimdi sóndirý úshin traktorlar, arnaıy tehnıka men jabdyqtar satyp alynyp jatyr. Orman órtterin erte anyqtaý júıesi «Qazaqtelekommen» birlesip júzege asyrylýda. «Jasyl aımaq» pen «Semeı ormany» sııaqty 24 orman sharýashylyǵy aýmaqtaryn zertteý jumystary bastaldy», dep habarlady Úkimettiń baspasóz qyzmeti.
Sonymen qatar 6 óńirde jańa orman tálimbaqtaryn qurý jumystary júrgiziledi. Jalpy bıýdjet 21,2 mlrd teńgeni quraıdy, árbir tálimbaqqa 3,5 mlrd teńgeden qaralǵan. Onyń qýaty – 6 mln kóshet. Qurylys 2025 jyly bastalady. Bıoalýantúrlilikti saqtaý tujyrymdamasyn ázirleý bastalǵan.
«Jańa erekshe qorǵalatyn tabıǵı aýmaqtar (EQTA) – «Merke» óńirlik parki (86 myń ga), «Aral» (471 myń ga) jáne «Jaıyq ormany» (46,9 myń ga) rezervattary qurylýda. Úsh aýmaqty – Ústirt, Qarataý, Ile-Balqash, 648 myń gektarǵa keńeıtý josparlanýda. 6 EQTA-da baqylaý ótkizý pýnkterin avtomattandyrý jáne elektrondyq tólem júıesi engizilýde. Ormanshylarǵa arnalǵan bilim berý ortalyǵy ashylady», delingen habarlamada. Esterińizge sala keteıik, 2024 jyldan bastap Prezıdenttiń «Taza Qazaqstan» bastamasy júzege asyrylyp jatyr. Ekologııalyq qozǵalysqa 6 mln adam, onyń ishinde 230 myń erikti qatysqan. 1,1 mln tonna qoqys jınalyp, 1,6 mln aǵash otyrǵyzylǵan. Ekomádenıetti damytýdyń 2029 jylǵa deıingi Tujyrymdamasy bekitilip, óńirlik josparlar maquldandy. Ekologııalyq bastamalar qoǵam tarapynan belsendi qoldaýǵa ıe bolyp otyr. «2 mlrd túp aǵash otyrǵyzylyp jatyr. 2021 jyldan bastap 1,145 mlrd aǵash egildi. Sondaı-aq Aral teńiziniń qurǵaǵan tabanyn kógaldandyrý jumystary júrgizilýde – 1,1 mln gektarǵa sekseýil otyrǵyzý josparlanǵan.Qatty turmystyq qaldyqtarǵa qatysty máselelerdi sheshý maqsatynda 238 mlrd teńgege 94 jobadan turatyn pýl qalyptastyryldy. Zamanaýı polıgondar salý, qaıta óńdeýdi damytý jáne qaldyqtardy bólek jınaýdy engizý negizgi baǵyttar sanalady. Sırek kezdesetin janýarlardy tabıǵatqa qaıta jiberý jumystary jalǵasýda. Jolbarystardy, qulandardy jáne Prjevalskıı jylqylaryn qaıta jersindirý baǵdarlamalary júzege asyrylyp otyr», delingen habarlamada.