Astanada memleket jáne qoǵam qaıratkeri Qýanysh Sultanovtyń «Qazaqtyń Qonaevy» jáne «Otyz jyldyń oı-tolǵaýy» atty kitaptarynyń tusaýkeser rásimi ótti. Jańa týyndyda avtor ózi kýá bolǵan estelikterdi baıandap, keńestik tustaǵy ádiletsizdikter men qaıshylyqtar týraly tolǵamdy oılarymen bólisken.
«Qazaqtyń Qonaevy» – ultymyzdyń dara perzenti Dinmuhamed Qonaevtyń uzaq jyldar ult múddesine saı atqarǵan qaıratkerlik eńbegine arnalady. Qýanysh Sultanovtyń estelikterinde tarıhı oqıǵalar men tolqýly sátter baıandalady. Odaqtyq ústemdik jaǵdaıyndaǵy ádiletsizdikter men qaıshylyqtar saraptalyp, qarapaıym tilmen oqýshy nazaryna usynylady.
Qýanysh Sultanov pen jýrnalıst Gúlsim Eńsepovanyń «Otyz jyldyń oı-tolǵaýy» atty suhbattaryna basty qundylyq – táýelsizdik jaıy, ony qasterleý, ulttyq qaýipsizdigimizdi kúsheıtý, elimizdiń dúnıejúzilik qoǵamdastyqtaǵy, halyqaralyq bedeliniń ósýi, el turmysynyń sapasyn kóterý syndy mańyzdy máselelerdi arqaý etken. Suhbat naqty derekterge súıene otyryp, jeńil áńgime túrinde baıandalady.
Alqaly jıynnyń tizginin ustaǵan memleket jáne qoǵam qaıratkeri Darhan Myńbaı tolymdy eńbektiń tarıhı mańyzdy tustaryna toqtaldy. Sol dáýirdiń beınesin zerdeleıtin derekter esteliktermen órile sýretteletinin aıtty.
Ádebı is-sharada sóz alǵan memleket jáne qoǵam qaıratkeri Myrzataı Joldasbekov Qýanysh Sultanulynyń el órkendeýi men ıgiligi jolynda atqarǵan keleli isterin atap ótip, jınalǵandarǵa aq batasyn berdi.
Sondaı-aq Prezıdent keńesshisi, akademık Baýyrjan Omarov qos jınaqtyń ulttyq múdde, eldik maqsat jolynda qandaı mańyzǵa ıe ekenin tilge tıek etti.
Al memleket jáne qoǵam qaıratkerleri Ádil Ahmetov tarıh paraqtarynan syr shertken mundaı týyndylardyń jaryqqa shyǵýy, eń aldymen egemendiktiń arqasy ekenin atap ótti.
«Qos jınaqty paraqtap otyryp mynadaı oı túıdim. «Kez kelgen irgeli memlekettik tulǵa – sol ózi ómir súrgen dáýirdiń aınasy». Osy sózdi Qýanysh Sultanulyna da aıtar edik. Sol zamannyń beınesi kitap bolyp shyqqan osy estelikterde tur. Eń bastysy, syndarly kezeńniń syryn aqtarǵan osyndaı eńbektiń jazylýy – el egemendiginiń arqasy. Táýelsizdigimiz bolmasa, mundaı azat oıly pikirler ashyq jarııalanbas edi», dedi Ádil Ahmetov.
Budan bólek Qyrymbek Kósherbaev, Abaı Tasbolatov, Mahmud Qasymbekov, Saılaý Batyrshauly, Mırbolat Jaqypov, Eraly Toǵjanov syndy belgili tulǵalar da jańa týyndy haqyndaǵy tolymdy oılarymen bólisip, estelikterin aıtty.
Rýhanı is-sharaǵa zııaly qaýym ókilderi, memleket jáne qoǵam qaıratkerleri men depýtattar qatysty.