«Astana Opera» teatrynda ataqty kompozıtor I.S.Bahtyń 340 jyldyǵyna arnalǵan «Bah jáne onyń zamandastary» atty aıtýly is-shara aıasynda barokko mýzykasynyń festıvali ótti.
«Astana Opera» orkestriniń solısi, Qazaqstannyń eńbek sińirgen qaıratkeri Aısulý Baıkenova mádenı is-sharaǵa kóptegen daryndy oryndaýshy qatysqanyn jetkizdi.
«Biz festıvalge aýqymdy baǵdarlama daıyndadyq. Týyndylardyń san alýan túrin sahnaǵa shyǵarý úshin solısterge ǵana emes, orkestrge de aıtarlyqtaı salmaq tústi. О́ıtkeni orkestr osy baıqaýǵa aýqymdy úsh mýzykalyq kesh ázirledi», dedi ol.
Onyń aıtýynsha, barokko dáýiriniń shyǵarmalaryn oryndaý – jeke ǵylym. Bul mýzykanyń mazmuny basqa. Elordadaǵy mýzykanttardyń turaqty repertýaryna múlde uqsamaıdy. Mundaı kompozısııa teatr men konsert zaldarynyń sahnalarynda sırek usynylady. Bir jaǵynan, barokko mýzykasyn oryndaýdyń óz ereksheligi bar. Sondyqtan bul kesh kórermenge ádemi áser syılady.
Festıvaldiń alǵashqy kúninde Aısulý Baıkenovamen birge konsertte jeke partııalardy teatr ártisteri – skrıpkashy Aqmaral Janǵazına, vıolonchelıster Kýrvanjan Ahatov, Dıarjan Ahatov, fleıtashylar Alekseı Kosyrev, Aleksandr Taraskın jáne shaqyrylǵan pıanıst Anara Kamelınova usyndy. Bul keshte Bahtyń solo vıolonchelge arnalǵan sıýıtasynan №1 prelıýdııa, sol major, 3 bólimnen turatyn orkestr men skrıpkaǵa arnalǵan konsert, lıa mınor, 3 bólimnen turatyn №4 Brandenbýrg konserti, sol major, 3 bólimnen turatyn orkestr men fortepıanoǵa arnalǵan №1 konsert, re mınor sekildi shyǵarmalary shyrqaldy. Budan bólek, A.Vıvaldıdiń 3 bólimnen turatyn eki vıolonchel jáne ishekti aspaptar orkestrine arnalǵan konserti, sol mınor oryndaldy.
Al festıvaldiń qorytyndy keshinde Aısulý Baıkenova óziniń aspapshy áriptesteri – skrıpkashylar Karına Anıkýshına, Ásem Jaqparova, Balnur Qudaıbergen jáne Shalqar Jeldibaımen, sondaı-aq goboılar tobynyń konsertmeısteri Qazaqstannyń eńbek sińirgen qaıratkeri Damılıa Mahpırovamen, fagottar tobynyń konsertmeısteri Áset Neldibaevpen birge tyńdarmanǵa tamasha tartý jasady.
Qaısar QUSAIYN