Qazaqstannyń ornyqty damýy men aınalmaly ekonomıkasynyń óristeýine serpin berer tyń joba bastaý aldy. Elordada «Smart Plastic Zone» jobasynyń tanystyrylymy ótti.
Elimizde plastık ónimderimen jumys isteýdi ilgeriletip, qoldaý baǵytynda «Smart Plastic Zone» jańa jobasy iske qosyldy. «GPI-Lab» JShS jáne GreenUrban qaýymdastyǵy júzege asyratyn jobanyń maqsaty – plastıkpen jumys isteýdiń turaqty ádisterine kóship, ekologııalyq, áleýmettik jáne korporatıvtik jaýapkershilik (ESG) qaǵıdattaryn ustanýdyń mańyzdylyǵyn uǵyndyrý. Iаǵnı jobaǵa qatysýshy kompanııa nemese ár adam plastık qaldyqtaryn azaıtýǵa úlesin qosyp, ekologııalyq taza bolashaqty qoldaýǵa septigin tıgizedi.
Jobaǵa qatysýshylar eki nomınasııa boıynsha atqarǵan jumystaryn usyna alady. Máselen Smart Plastic Zone (Silver) nomınasııasy plastıkti turaqty paıdalanýǵa qadam jasaǵandar arasyndaǵy úzdikterge beriledi. Al Smart Plastic Zone (Gold) atalymynda óz qyzmetinde ekologııalyq tájirıbeni belsendi qoldap júzege asyryp kele jatqan kóshbasshylar marapattalady.
Úmitkerler atqarǵan jumystarynyń qorytyndysyn GPI.KZ saıty arqyly joldap, irikteýden ótkenderge «Smart Plastic Zone» belgisi beriledi. Bul eń jaýapty jáne ekologııaǵa zııan keltirmeıtin taza bıznestiń ozyq úlgisi sanalady.
Pılottyq joba bıyl Astana, Almaty jáne Qaraǵandy qalalarynda júzege asty. Synaq kezeńi sátti aıaqtalǵan soń elimizdiń barlyq óńirin qamtymaq. Bul joba plastıkalyq qaldyqtardy azaıtyp, eldiń bolashaǵy úshin mańyzdy ekologııalyq standarttardy saqtaýǵa serpin bermek. Is-shara qorytyndysynda qanatqaqty jobaǵa úles qosqan birqatar azamattar marapattaldy.