Úkimet Memleket basshysynyń tapsyrmasyna sáıkes, zańsyz ıemdenilgen aktıvter esebinen áleýmettik ınfraqurylymdy damytý jobalaryn júzege asyryp jatyr.
Túrkistan oblysy Saryaǵash aýdanyndaǵy magıstraldy sý qubyryn rekonstrýksııalaý jumystaryn aıaqtaý úshin Arnaýly memlekettik qordan 2,5 mlrd teńgeden astam qarjy bólindi. Joba 260 myńnan astam turǵyny bar 66 aýyldy sýmen qamtamasyz etýge baǵyttalǵan.
Jobanyń jalpy quny shamamen 6,5 mlrd teńgeni quraıdy. Onda 34,3 shaqyrym jeli qurylysy qarastyrylǵan, onyń 20,8 shaqyrymy buryn bólingen qarajat aıasynda tóselgen.
Qazirgi ýaqytta elimizde sýmen jabdyqtaý qyzmetterine qoljetimdilik qalalyq jerlerde 99,4%-dy, aýyldyq eldi mekenderde 97,8%-dy quraıdy. Túrkistan oblysy boıynsha qala – 100%, aýyldar 98,1% aýyzsýmen qamtylǵan.
Qazirgi tańda Arnaýly memlekettik qordan bilim berý, densaýlyq saqtaý, sport, áleýmettik qamsyzdandyrý sııaqty salalardaǵy jobalardy júzege asyrý, sondaı-aq ınjenerlik jeliler men sý qurylystaryn jańartý úshin qarajat bólindi.