Kásipqoı bokstan orta salmaqtaǵy WBC nusqasynyń chempıony Karlos Adames kúni keshe ǵana Astanada fransııalyq Anaýel Ngamıssengany besinshi raýndta uryp jyǵyp, eki birdeı altyn belbeýin qorǵap qalǵan Jánibek Álimhanulyn jekpe-jekke shaqyrdy.
30 jastaǵy Domınıkan Respýblıkasynyń ókili BAQ ókilderine bergen suhbatynda: «Men Jánibekpen judyryqtasýdy kópten beri kózdep júrgen edim. Biraq ortaq mámilege kele almadyq. Endi sáti keldi dep oılaımyn. Eger osy jospar júzege assa, jer-jahan jankúıerleri keremet shoýdyń kýási bolatyny anyq. Álimhanulynyń jaqsy boksshy ekenin moıyndaımyn. Ony ózi de dáleldep júr. Biraq ol meni utatyndaı dárejede emes», dep senimdi sóıledi.
Karlos Adames kásipqoı rıngtegi jolyn osydan 10 jyl buryn bastaǵan. Sol aralyqta 26 kezdesý ótkizip, 24 ret jeńiske jetti. 18 qarsylasyn nokaýtqa jiberdi. Osydan alty jyl buryn brazılııalyq Patrık Teısheıradan upaı sanymen utylsa, bıyl aqpan aıynda ulybrıtanııalyq Hamza Shırazben teń tústi.