Ile aýdanyna qarasty Qaraoı aýylynda qumaı tazylar arasynda «Asyl mura – 2025» ashyq oblystyq týrnıri ótti, dep habarlaıdy Egemen.kz.
Saıysqa Almaty, Shyǵys Qazaqstan, Abaı jáne Jetisý oblystarynan 70-ten asa saıatshy, sondaı-aq kórshi qyrǵyz elinen de qumaı tazy baptaýshylar keldi. Bul jarys shyrǵa tartýdan oblystaǵy jazǵy maýsymnyń ashylǵanyn bildiredi.
«Bizdiń oblysta qumaı tazy ósirýde Ile, Talǵar jáne Eńbekshiqazaq aýdandary alda keledi. «Asyl mura» oblystyq federasııasy quryldy. Byltyr demeýshilerdiń arqasynda osy tektes 7 jarys uıymdastyrdyq. Bıyl mamyr jáne qazan aılarynda Qaraoı aýylynda respýblıkalyq saıys ótkizýdi josparlap otyrmyz. Eger taǵy da demeýshiler tabylyp jatsa, qosymsha týrnır ótkizýdi qolǵa alamyz. Barǵan saıyn jarys aýqymy keńeıe túsýde. Qyrǵyzstannan qatysýshylar kelip jatyr. Buǵan, árıne, qýanasyń. О́ıtkeni, mundaı bastamalardyń qaı-qaısysy da ulttyq muramyzdy saqtaýǵa qyzmet etedi», deıdi «Asyl mura» oblystyq tazy federasııasynyń prezıdenti Ernar Múptekeev.
«Asyl qazyna» respýblıkalyq tazy federasııasynyń bekitilgen erejesine sáıkes, jarysta qashyqtyq 1000 metrdi qurady. Tazylar eki kezeń boıynsha synǵa tústi. Aldymen shaǵyn toptarǵa bólinip kim myqtyny anyqtady. Budan keıingi báseke shaǵyn toptar jeńimpazdary arasynda ótti.
«Búgingi kóńil-kúıimiz tamasha. Tazymdy saıysqa osymen tórtinshi ret qatystyryp otyrmyn. Jarys óte tartysty ótti. Abaı óńiriniń asyl tuqymdy ıtterine ese jiberip qaldyq. Eń bastysy, bul jarystan tazy baptaýdyń ádis-tásilderine qanyǵyp, biraz tájirıbe jınaqtadyq», deıdi saıatshy Ermek Saıaqov.
«Urǵashy qumaı tazy» nomınasııasy boıynsha 25 tazy baq synady. Nátıjesinde Abaı oblysynan Aman Dúkenovtiń «Juldyz» atty tazysy birinshi oryn aldy. Jetisý oblysynan qatysqan Mereı Ahmetovtiń «Qarshyǵasy» ekinshi oryn ıelendi. Al úshinshi júlde Ile aýdanynan Nurǵalı Nuryshevtiń «Alaman» atty tazysyna buıyrdy.
60 tazy jarysqa túsken «Erkek qumaı tazy» nomınasııasynda ilelik Aıdyn Qudaıbergenovtyń «Syldy» tazysy, jetisýlyq Talas Muhtarbekovtiń «Karajoly» jáne Balqash aýdanynan Erlan Shybekov baptaǵan «Kókdaýyl» atty tazysy júldeger atandy.