Armenııa Respýblıkasynda ótken Qazaqstannyń mádenı kúnderi aıasynda Aram Hachatýrıan atyndaǵy konsert zalynda otandyq ónerpazdardyń gala-konserti ótti. Aýqymdy mádenı is-shara el Prezıdenti Qasym-Jomart Toqaevtyń Erevan qalasyna jasaǵan resmı sapary barysynda Memleket basshylary arasyndaǵy kelisimder nátıjesinde uıymdastyryldy.
Saltanatty jıynǵa Qazaqstan Respýblıkasy Mádenıet jáne aqparat mınıstri, resmı delegasııa basshysy Aıda Balaeva, Armenııa Respýblıkasynyń Bilim, ǵylym, mádenıet jáne sport mınıstri Janna Andreasıan, Qazaqstan Respýblıkasynyń Armenııadaǵy Tótenshe jáne ókiletti elshisi Bolat Imanbaev, sondaı-aq armıan zııaly qaýymy ókilderi, dıplomatııalyq korpýs, shyǵarmashylyq odaqtar, qazaq dıasporasy, ǵalymdar, jazýshylar men mádenıet qaıratkerleri qatysty.
«Búgingi ıgi is-shara – Memleket basshylarynyń dostyq qarym-qatynasy men eki el arasyndaǵy strategııalyq áriptestiktiń jemisi. Bizdiń búgingi kezdesýimiz qasıetti Pasha merekesimen tuspa-tus kelip otyrǵanyn atap ótkim keledi. Bul da – dostyq pen birliktiń, janashyrlyq pen meıirimge bastaıtyn izgiliktiń sımvoly. Aldaǵy ýaqytta elderimiz arasyndaǵy baılanys berik ári nátıjeli bolaryna senemin. Sebebi óner men mádenıette eshqandaı shekara bolmaıdy. Mádenıet elderdi biriktiredi, halyqtar arasyndaǵy ózara túsinistik pen qurmettiń negizin qalaıdy. Ortaq qundylyqtar men shyǵarmashylyq baılanys – beıbitshilik pen dostyqtyń myzǵymas dánekeri», dedi A.Balaeva quttyqtaý sózinde.
Gala-konsert baǵdarlamasy kórermenge erekshe áser syılady. Onda halyq ánderi men zamanaýı kompozıtorlardyń týyndylary, qazaqstandyq estrada, klassıka men folklor úndesip, úılesim tapty. Sahna tórinde aty ańyzǵa aınalǵan ánshi, Qazaqstannyń Eńbek Eri Roza Rymbaeva, Qazaqstannyń eńbek sińirgen qaıratkerleri Aleksandr Belıakov pen Áıgerim Beketaeva, «HasSak» etnofolklorlyq ansambli, «Birlik» bı ansambli, «Daryn» Memlekettik jastar syılyǵynyń laýreattary Rasýl Jarmaǵambetov, Asqar Muqııat jáne basqa da ártisterimiz óner kórsetti.
Armenııadaǵy Qazaqstannyń mádenı kúnderi aıasyndaǵy is-sharalarǵa 3 myńnan astam adam qatysty. Sondaı-aq qos eldiń mınıstrleri – Aıda Balaeva men Janna Andreasıan arasynda ekijaqty kezdesý ótip, mádenı yntymaqtastyqty keńeıtý máseleleri talqylandy. Is-sharalar baǵdarlamasynda qazaqstandyq fılmder kórsetilip, Erevan qalasynda Abaı Qunanbaıuly atyndaǵy saıabaqtyń saltanatty ashylýy ótti.
Buǵan qosa, Qazaqstannyń resmı delegasııasy túrli salalar boıynsha armıan áriptesterimen kezdesýler ótkizip, aqparat, mýzeı jáne kitaphana isi, kınoóndiris salalaryndaǵy yntymaqtastyqtyń keleshegi, birlesken bastamalar jóninde pikir almasty.
Aıta keteıik, Qazaqstan men Armenııa arasyndaǵy dıplomatııalyq qarym-qatynastar ornaǵan ýaqyttan beri mundaı aýqymdy mádenı is-shara alǵash ret uıymdastyrylyp otyr. Eske salsaq, buǵan deıin 2024 jyldyń qazan aıynda Astanada Armenııa mádenıeti kúnderi ótken edi.