«Tún araldy jyp-jyly kıindirdi...» Aleksandr Blokta osyndaı ózgeshe óleń bar-tyn. Sonymen qatar bul óleńde uzyn-sonar ári názik, sanaǵa tumandy jastyqtyń boıaýly jyldaryn ákeler taǵy bir jol bar. «Armanymnyń kóktemi alys qaldy...»
Paýstovskııdiń «Altyn raýshan» kitabyndaǵy Blokqa qatysty bólimi joǵarydaǵydaı joldarmen bastalady. Iá, Blok poezııasynda júrek tynyshtyǵy, jan tereńiniń izi bar. Pýshkın aıtqandaı, «tereń sý jaı aǵar, asyl adam saıabyr bolar». Birde Blok Maıakovskııdiń mýzeıde ótken keshine barady. Sonda mýzeıde adam kól-kósir bolǵan desedi. Keıin ózi óleńderin oqymaqqa ádebı kesh jasaıdy, bes-aq adam keledi. Sodan Blok únsiz ǵana bas ızep, shaǵyn sahnaǵa shyǵyp bir saǵattaı óleń oqyǵan eken.
«Tún, kóshe, dárihana, shamdar,
Maǵynasyz jaryq bir kúńgirt.
Shırek ǵasyr ómir áli aldar –
Bári de sol ǵoı. Sońy joq tirlik.
О́lip — bárin bastap qaıtadan
Baıaǵy kúıdi qaıtalap taǵy:
Tún, arna sýy muzdaı shaıqalǵan
Dárihana, kóshe, kúp-kúńgirt shamy». (Aýdarǵan – D.S.)
Keńinen tanymal eki shýmaqtan ómir aǵysynyń mánsizin, jalǵannyń jarǵa aıdalǵan arbadaı ótkinshi, túbi oıran ekenin túsinýge bolady. Blok eshbir oıdy attandap, ne kúshenshektikpen jetkizbeıdi. Pafos jeli oǵan qas.
Paýstovskıı Blok tynyshtyǵyn ózinshe sýretteıdi. «Kúz kúninde qara ózenniń betin qurǵaq japyraqtar jabatyn. Jaǵalaýdan soń qalanyń jumysshylar turatyn qalashyǵy bastalady. Kásiporyndar, keme jóndeıtin oryndar, keme dińgekteri, tútin men kesh aldyndaǵy bozań aspan. Biraq jaǵalaý bos ári tynysh, aýyldyń eń túkpiri osy jer ispetti. Bul Blok sekildi ońasha, oǵash oryn. Múmkin Blok osy tynyshtyq pen ózenge jaqyn mańdy izdegen bolar. Onyń jyrlary adam júreginiń tynyshtyǵyna shaqyrady».
Rasynda, «dúnıede baqyt joq, tek erkindik pen tynyshtyq qana bar». Bul daýsyz shyndyq.