Ulttyq kitap kúni qarsańynda Almaty Memlekettik qýyrshaq teatry jas kórermenge erekshe syı tartty. Álemge áıgili nemis jazýshysy Otfrıd Proıslerdiń balalar ádebıetindegi jaýhary sanalatyn «Kishkentaı sıqyrshy» povesiniń jelisimen sahnalanǵan «Orman ǵajaıyptary» atty jańa qoıylymnyń premerasyn usyndy.
Balalar ádebıetiniń altyn qorynan oryn alǵan bul shyǵarma – jaqsylyq pen zulymdyq, batyldyq pen meıirim, adaldyq pen izgilik taqyryptaryn qozǵaıtyn oıly dúnıe. Ertegi keıipkerleriniń sahnaǵa shyǵýy – kitapqa degen súıispenshilikti jańa deńgeıge kóterýdiń sátti úlgisi bolǵandaı.
Spektakl rejısseri – Anton Zaısev. Onyń shyǵarmashylyq jetekshiligimen teatr repertýary «Ana júregi», «Abaı. Men bir jumbaq adammyn...» «Úıshik», «Baýyrsaq» sııaqty basqa da qoıylymdarmen jańa tynys alyp, zamanaýı rejısserlik sheshimder men tyń shyǵarmashylyq baǵyttar arqyly jańasha túrlenip, ózgeshe lepke ıe boldy.
Al qoıylymnyń sahnalyq kórkemdeýin jasaǵan – Aqtóbe oblystyq qýyrshaq teatrynyń dırektory Ásııa Qurmanalına. Onyń beınelik sheshimderi men sahnalyq keńistikti tanı biletin kásibı talǵamy spektakldiń estetıkalyq deńgeıin aıryqsha bıikke kóteredi. Qoıylymnyń mýzykalyq álemin kompozısııalyq úılesimmen árlegen – Andreı Dolgorýkov, al sahnalyq qozǵalys pen plastıkalyq kórinisterdi horeografııalyq tásilder arqyly mazmundy etken – Arystan Túıjanov.
Ertegide 15-ten asa túrli qýyrshaq túri sahnaǵa shyǵady. Jas kórermen planshetti, trosty, parketti, boıly syndy san alýan qýyrshaq túrleriniń sıqyrly álemine enip, ár keıipkerdiń bolmysy men minezine tereń úńile aldy. Ár qýyrshaqtyń ózindik plastıkasy men beınelik sheshimi arqyly spektakl kórkemdik turǵydan baıyp, kórýshige erekshe estetıkalyq áser syılady.
Sondaı-aq premera aıasynda Almaty qalasynyń Ortalyqtandyrylǵan kitaphana júıesimen birlesip kitap kórmesi usynyldy. Atalǵan kórme jas kórermenniń kitap oqýǵa qyzyǵýshylyǵyn oıatyp, ádebıetke degen súıispenshiligin arttyrý, olardyń rýhanı damýyna jol ashýdy maqsat etedi.