Belgili kásipker Dýlat Tastekeı Halyqaralyq kitap kúni qarsańynda «Artyq bilim – kitapta» atty erekshe bastamaǵa uıytqy boldy.
«Assyltas» qoǵamdyq qorynyń negizin qalaǵan azamat óziniń týǵan óńiri – Abaı oblysyna 14 myńnan astam kitapty syıǵa tartty. Endi osy óńirdegi 233 mekteptiń árqaısysy 60-tan asa tańdaýly kórkem jáne tanymdyq týyndylardy ala alady.
Osylaısha, Dýlat Tastekeı ózge óńirlerdegi mesenattardy bul aǵartýshylyq chellendjdi jalǵastyrýǵa shaqyra otyryp: «Artyq bilim – kitapta» aksııasy – bul aǵartýshylyq estafeta. Biz elimizdiń basqa óńirlerindegi jomart jandar men kásipkerlerge, júregi el dep soqqan barlyq azamatqa úndeý tastaımyz. Kelińizder, óz oblystaryńyzdaǵy mektepterge de osyndaı kitap tartý dástúrin bastaıyq. Sebebi kitap oqıtyn bala – erteń eldiń tiregi, al kitapty qurmettegen halyq – máńgi jasaıtyn ult», dedi Dýlat Tastekeı.
Qundy kitaptarǵa toly úlken júk kólikteri Almaty qalasynan shyǵyp, Abaı oblysynyń Aıagóz qalasyna bet aldy. Bul kitaptar mektep kitaphanashylaryna saltanatty túrde tabystaldy.
Jobanyń basty maqsaty – otandyq oqýshylardy kitap oqýǵa shabyttandyrý, kitapty kúshtiń, oıdyń jáne tildiń qaınar kózi retinde qaıta jańǵyrtý.
«Artyq bilim – kitapta» jobasy «Assyltas» qorynyń túpki maqsatyna tolyq sáıkes keledi. Áý bastan, qordyń kózdegen maqsaty – elimizdiń aýyldyq aımaqtaryndaǵy árbir balaǵa bilim alýda, rýhanı jáne zııatkerlik turǵydan teń múmkindik jasaý bolatyn.
Joba uly oıshyl Abaı Qunanbaıulynyń 180 jyldyǵyna arnalady jáne Halyqaralyq «Qazaq tili» qoǵamy men Abaı oblysy ákimdiginiń qoldaýymen júzege asyp jatyr.
ALMATY