2026 jyldan bastap Qazaqstanda birqatar dári-dármek pen medısınalyq qyzmetterge qosymsha qun salyǵynyń 5% tómendetilgen mólsherlemesin belgileý josparlanyp otyr. Bul týraly Densaýlyq saqtaý mınıstri Aqmaral Álnazarova aıtty, dep habarlaıdy Egemen.kz.
«Bastapqyda 10 paıyzdyq QQS engizý josparlanǵan bolatyn. Alaıda búgingi talqylaýlardan keıin biz 2026 jyldan bastap dári-dármekter men medısınalyq qyzmetterge tómendetilgen – 5 paıyzdyq QQS mólsherlemesin belgileý týraly sheshimge keldik. Mindetti áleýmettik medısınalyq saqtandyrý (MÁMS) jáne memlekettik tegin medısınalyq kómektiń sheńberindegi qyzmetter qosymsha qun salyǵynan tolyq bosatylady», dedi mınıstr Úkimette ótken brıfıngte.
Mınıstrdiń aıtýynsha, QQS-dan bosatylatyn dárilik zattar men medısınalyq qyzmetterdiń tizimi jasaqtalady.
«Bul – áleýmettik turǵydan mańyzdy preparattar tizimi, ıaǵnı eń jıi satyp alynatyn dáriler men búginde jeke medısınalyq uıymdar kórsetip otyrǵan medısınalyq qyzmetter. Mysaly, pallıatıvtik jáne onkologııalyq kómek kórsetý de QQS-dan bosatylady», dep tolyqtyrdy A. Álnazarova.
Eske salaıyq, buǵan deıin Qazaqstan Úkimeti QQS bazalyq mólsherlemesin 16 paıyz deńgeıinde belgileýdi usynǵan bolatyn. Degenmen, keıbir salalar úshin saralanǵan mólsherleme qoldanylady.