Deptýtat Maqsat Tolyqbaı «Aýyl amanaty» jobasynyń júzege asyrylý barysyna alańdaýshylyq bildirip, Úkimet pen salalyq mınıstrlikterge naqty usynystar joldady, dep jazady Egemen.kz.
Halyq qalaýlysynyń aıtýynsha, Memleket basshysy jarııalaǵan «Tyńdaýshy memleket» tujyrymdamasy aıasynda atqarýshy bılik azamattardyń ótinishterine ýaqtyly ári mazmundy jaýap berýi tıis. Alaıda is júzinde bul talap oryndalmaı otyrǵany baıqalady. Depýtat kótergen birneshe mańyzdy másele formaldy, mazmunsyz jaýaptarmen shektelip jatqanyn atap ótti.
Atap aıtqanda, depýtat 2023 jyly bastalǵan «Aýyl amanaty» jobasy boıynsha aýyl turǵyndaryna 100 mlrd teńge kóleminde shaǵyn nesıe berilgenin, alaıda 2024 jyly bıýdjet tapshylyǵyna baılanysty bul soma 20 mlrd teńgege deıin qysqarǵanyn eske saldy. Aýyl halqynyń tabysyn arttyrýǵa baǵyttalǵan bul joba el ishinde úlken úmit pen senim týdyrǵan. Degenmen, ákimdikter uzaq ýaqyt qujat jınaǵanymen, qarajattyń jetispeýi saldarynan jurttyń shaǵymy kóbeıgen.
Sonymen qatar depýtat «Aýyl amanaty» baǵdarlamasy aıasynda barlyq aýyldyq eldi mekenderde «Agrosaýat» oqý ortalyqtaryn qurý qajettigin aıtty. Pılottyq joba retinde Jambyl oblysynyń Merki aýdanynda iske asyrylǵan bastama oń nátıje kórsetken. Joba aıasynda jeńildetilgen nesıe alǵan aýyl turǵyndary aýyl sharýashylyǵy salasy boıynsha kásibı oqýdan ótip, uzaq merzimdi qoldaýǵa ıe bolǵan.
Memleket basshysy da bul bastamany qoldap, Úkimet pen ákimdikterge «Agrosaýat» ortalyqtaryn basqa óńirlerde ashý týraly tapsyrma bergen. Alaıda depýtattyń aıtýynsha, Ulttyq ekonomıka mınıstrliginiń resmı jaýabynda bul usynys eskerýsiz qalǵan jáne búgingi kúnge deıin naqty sharalar qabyldanbaǵan.
«Bul — jaýapsyzdyq. Másele tek nesıe berýmen shektelmeıdi. Aýyl kásipkerlerin oqytý, kooperatıvterge biriktirý, ónim ótkizý tizbegin úıretý – keshendi qoldaýdyń mańyzdy bóligi. "Agrosaýat" ortalyqtarynyń joqtyǵynan qarjylyq turaqsyzdyq pen nesıeniń qaıtarylmaýy sııaqty máseleler týyndap otyr», dedi depýtat.
Osyǵan baılanysty májilismen kelesi eki naqty usynysty engizip otyr:
Oblystarda «Agrosaýat» oqý ortalyqtaryn qurý boıynsha naqty is-sharalar josparyn tez arada ázirleý;
Atalǵan ortalyqtardyń qyzmetin qarjylandyrýdy, aýyl sharýashylyǵy ónimin qaıta óńdeý jáne ótkizý ınfraqurylymyn damytýdy kózdeıtin bıýdjettik baǵdarlamany naqtylaý.
Maqsat Tolyqbaıdyń pikirinshe, «Aýyl amanaty» jobasynyń áleýeti zor. Alaıda formaldy kózqaras pen oryndalmaǵan tapsyrmalar jobanyń mazmunyna nuqsan keltirip otyr. Sondyqtan Úkimet bul baǵytta naqty ári júıeli sheshimder qabyldaýy tıis.