«Taza Qazaqstan» respýblıkalyq baǵdarlamasy men «Almaty – bizdiń ortaq úıimiz» jalpy qalalyq naýqan aıasynda uıymdastyrylǵan shara 28 gvardııashy-panfılovshylar saıabaǵynda ótti. Oǵan shahar basshysy Erbolat Dosaev soǵys ardagerleri men olardyń otbasy músheleri, qoǵam ókilderi qatysty, dep habarlaıdy Egemen.kz.
Almaty ákimi ardagerlerdiń týystarymen birge bıiktigi 6 metr bolatyn jóke aǵashyn ekti. Ár aǵashtyń janyna ardagerdiń aty jazylǵan arnaıy taqtaısha ornatyldy. Jóke –ómirsheńdiktiń, jad pen rýhtyń belgisi.
Sol sebepti ony soǵys ardagerleriniń qurmetine jıi otyrǵyzady. Bul keleshekke beıbit ómir syılaǵan jandardyń qurmetine qoıylǵan tiri eskertkish. Aǵash otyrǵyzý kezinde zamanaýı ádistermen tehnologııalar qoldanyldy: aǵashty tik ustaýǵa arnalǵan qaıyń tirekter, sondaı-aq, tamyr arqyly sýarý júıesi ornatyldy.
«Memleket basshysy áskerı sherýdegi sózinde: «Uly Jeńis – tarıhymyzdyń ajyramas bóligi jáne kúlli álem úshin úlken sabaq. Biz osy aqıqatty árdaıym este saqtaýymyz kerek», dep atap ótti. Biz beıbit ómir syılaǵan jandardy eshqashan umytpaýymyz qajet. Jeńistiń 80 jyldyǵyna oraı Almatyda bul mereıtoı erekshe formatta atap ótilýde: qalanyń barlyq aýdanynda bir mezette ardagerler alleıasy ashyldy. Bul jerlerdi ár aýdan turǵyny bilip, baryp, batyrlarymyzdyń rýhyna taǵzym etkenin qalaımyn. Almatyda búginde 21 soǵys ardageri turady – bul respýblıka boıynsha eń úlken kórsetkish. Biz sońǵy eki jylda ómirden ozǵan ardagerlerdi de qurmetpen eske alamyz. Búgin barlyǵy 29 aǵash egildi. Bul alleıalar bolashaq urpaq – balalar, nemere-shóbereler úshin batyrlyqty eske salyp turatyn tiri eskertkishke aınalady», dedi Erbolat Dosaev.
Ardagerlerdiń urpaqtary alleıa ashyp, Uly Otan Soǵysy ardagerleriniń esimin este saqtaýǵa jaǵdaı jasaǵany úshin qala basshysyna alǵys bildirdi.
«Soǵys ardagerleriniń barlyq urpaǵy atynan atalarymyzdyń, ákelerimizdiń, analarymyz ben ájelerimizdiń jarqyn beınesin eske alyp, qurmet kórsetkenderińiz úshin alǵys aıtamyn. Jóke – erekshe aǵash. Ol rýhtyń myqtylyǵyn, tózimdilik pen adaldyqty bildiredi. Bul kóne ári asyl sımvol bizge bolashaq urpaq úshin ómirin sarp etken jandardy árdaıym eske salyp turady. Hosh ıisti gúli men uzaq jasaıtyn qasıeti bar jóke – batyrlarymyzdyń júrekte saqtalatyn erligi sekildi, máńgilik tiri estelikke aınalady», dedi UOS ardageri Olga Savenkonyń nemeresi Iýlııa Zavadskaıa.
Soǵys ardageri Vasılıı Zınchenkonyń qyzy Lıýdmıla Zınchenko da shyn júrekten rızashylyǵyn bildirdi.
«Osyndaı aýqymdy is-sharaǵa qatysyp otyrǵanymyzǵa qýanyshtymyz. Búgin kún keremet, kóńil-kúıimiz de sondaı jaqsy. Mundaı mańyzdy oqıǵany uıymdastyrǵandaryńyz úshin barlyq ardagerdiń otbasylary atynan alǵys aıtqymyz keledi. Bul aǵashtar halqymyzdyń batyrlaryn umytpaýǵa múmkindik beredi. Biz bul jerge balalarymyzdy ertip kelip, otyrǵyzylǵan aǵashtarmen tanystyryp, atalarynyń erligi týraly aıtyp otyramyz», dedi ol.
100 jastaǵy UOS ardageri Qambar Sársenov pen soǵys ardageri Darbala Jabataevanyń qyzy Sáýle Qolymbaeva da alǵystaryn bildirip, bul tiri eskertkishter babalar erligin urpaqtar jadynda saqtaýyna sep bolatynyn aıtty.
Osy kúni 28 gvardııashy-panfılovshylar saıabaǵynda bıiktigi 6 metrlik 29 ataýly jóke aǵashy otyrǵyzyldy. Jalpy, UOS ardagerlerine arnalǵan ashyq alleıalarda 200 jóke egildi.