Astanada QR IIM Ulttyq ulanynyń áskerı qyzmetshileri kezekti ret kásibılikteri men kez kelgen sátte kómekke kelýge daıyn ekendikterin dáleldedi. Oqıǵa Saltanat saraıy mańynda oryn aldy. Avtobýs aıaldamasynan kele jatqan jas qyz kenetten ózin jaısyz sezingen.
Qyz jol boıyna jaqyn mańda turǵan áskerı qyzmetshilerden kómek surady. Jaǵdaı shuǵyl áreketti talap etti. Ulandyqtar birden iske kiristi.
Aǵa leıtenant Baǵlan Táteı, leıtenant Ádilet Muratov jáne qatardaǵy jaýynger Danııal Sársenǵalıev zardap shekken qyzdy qaýipsiz jerge shyǵaryp, alǵashqy medısınalyq kómek kórsetti.
— Biz kelgen kezde qyzdyń jaǵdaıy óte aýyr ekeni birden baıqaldy. Ol teńselip, áreń júrip kele jatty. Biz ony jol jıeginen alyp ketip, jaraqat alý qaýpin boldyrmaýǵa tyrystyq. Epılepsııa ustamasyna uqsas jaǵdaı boldy: qoldary qaltyrap, kózi buldyrap turdy. Biz ony bir qyrynan jatqyzyp, basyn ustadyq, esinen tanyp qalmaýy úshin únemi sóılesip otyrdyq. Eń bastysy – onyń qulap, ózine zaqym keltirip alýyna jol bermeý edi, – deıdi aǵa leıtenant Baǵlan Táteı.
Kýágerlerdiń aıtýynsha, qyzda epılepsııa ustamasynyń belgileri baıqalǵan. Áskerı qyzmetshiler jedel járdem shaqyryp, dárigerler qyzdy qalalyq aýrýhanaǵa jetkizdi.
Bul oqıǵa Ulttyq ulan áskerı qyzmetshileriniń tek qoǵamdyq tártipti saqtap qana qoımaı, tótenshe jaǵdaılarda azamattardyń senimdi qorǵany ekenin taǵy bir márte kórsetti.
Ulandyqtar – qaýipsizdiktiń kepili. Olar kún saıynǵy qyzmetimen erlikke daıyn ekenderin dáleldep keledi.