2026 jyldyń 1 qańtarynan bastap elimizde kitaptar men olardy basyp shyǵarý qyzmetteri qosylǵan qun salyǵynan bosatylady. Bul – otandyq baspa salasynyń tynysyn ashatyn mańyzdy sheshim. Osy tarıhı sát qarsańynda biz Arman-PV baspasynyń bas dırektory Dıdara Alınamen suhbattasyp, QQS-tyń joıylýy baspa men bilim salasyna qalaı áser etetinin, sondaı-aq jańa múmkindikterdiń kókjıegin saraladyq, dep jazady Egemen.kz.
– Dıdara hanym, QQS-tyń alyp tastalýy – baspa naryǵy úshin erekshe jaǵdaı. Siz bul sheshimdi qalaı qabyldadyńyz?
– Bul jańalyqty úlken úmitpen, ári kásibı jaýapkershilikpen qabyldadyq. Biz úshin bul tek salyq joıyldy degen sóz emes. Bul – memleket tarapynan kitaptyń, jalpy zııatkerlik eńbektiń qoǵam úshin mańyzyn moıyndaǵan sheshim.
Bul sheshim kezdeısoq emes. Bul – birneshe jyldar boıy jalǵasqan kásibı dıalogtyń, ortaq bastamanyń nátıjesi. Baspagerler qaýymdastyǵy atynan daıyndalǵan usynystar da eskerildi.
– Baspa isi – ózge bıznes salalarymen salystyrǵanda baıaý aınalymdy, ózindik ereksheligi bar sala. QQS osy salaǵa qalaı áser etip keldi?
– Dál aıtasyz. Baspa naryǵy – jyldam tutyný emes, uzaq merzimdi mazmun óndiretin sala. Bir kitaptyń artynda aılar men jyldarǵa sozylatyn eńbek, kóp salaly shyǵyn jatady. Bul – avtorlyq qalamaqy, redaksııa, kórkemdik óńdeý, dızaın, baspa jáne logıstıka shyǵyndary.
12 paıyzdyq QQS osy prosestiń báriniń ústinen qosylyp, kitaptyń túpki baǵasyn ósiretin. Ásirese balalar men oqý ádebıetine kelsek, bul baǵa qoljetimdilikti kúrt tómendetetin. Al endi QQS-tyń alyp tastalýy – bizge dem beretin sheshim. Bul salaǵa ınvestısııa tartýǵa da oń áser etedi.
– Arman-PV baspasynyń basty ereksheligi – sapaly oqý ádebıetin usynýy. Qarjylyq jaǵdaı jeńildese, kitap baǵasy arzandaı ma?
– Bizdiń baspa eshqashan sapa men mazmunnan ymyra izdegen emes. Biz úshin kitap – kommersııalyq ónimnen buryn, qoǵamdyq mańyzy bar rýhanı qundylyq. Baǵa saıasatynda da osy ustanymnan taıǵan joqpyz. Endi QQS-tyń joıylýy bizge belgili bir ıkemdilik beredi.
Máselen, keıbir basylymdardy keń aýdıtorııaǵa qoljetimdi etýge, burynnan josparlanǵan serııalardy iske qosýǵa, jańa avtorlarmen jumys isteýge múmkindik týady. Eń bastysy – sapany ustap turyp, mazmun men beıneleý mádenıetin tereńdete túsýge jol ashylady.
– Sapaly ádebıet degende eń aldymen balalar men oqýshylar oıǵa oralady. Baspanyń osy baǵyttaǵy ustanymy qandaı?
– Balalar men jasóspirimderge arnalǵan ádebıet – bizdiń basty baǵytymyz. Sebebi bul – eldiń bolashaǵyna jasalatyn ınvestısııa. Qazirgi bala – aqparatty tez qabyldaıtyn, vızýaldy jáne analıtıkalyq oılaýǵa beıim urpaq. Sondyqtan kitap onyń tek bilim kózi ǵana emes, dúnıetanymdyq serigi de bolýy kerek.
Sol sebepti biz tek mazmundy ǵana emes, kórkemdik sheshimderdi, tildik úılesimdilikti, ıllıýstrasııa men qurylymdy tutas oılaımyz. Jańa býynnyń tildik mádenıetin damytý úshin kórkemdik saýattylyq pen emosııalyq tartymdylyq qatar júrýi tıis. Oqýlyqtar da osy talaptarǵa saı bolýǵa tıis.
Bizdiń maqsatymyz – balanyń oılaý qabiletin keńeıtip, onyń boıyna bilimmen birge talǵam men seziný mádenıetin sińirý.
– Bul sheshim mektepke arnalǵan oqý quraldarynyń sapasyna qalaı áser etedi?
– О́te tikeleı ári naqty áser etedi. Qarjylyq turaqtylyq – mazmundy tereńdetýdiń eń basty sharty. Qazir bizde oqýlyqtar men oqý quraldaryna degen suranys joǵary, al sapaly kontentti jasaý – úzdiksiz izdenis pen maman eńbegin qajet etedi.
QQS-tyń joıylýy bizge ǵylymı sarapshylarmen, ádiskerlermen, kórkemdeýshi mamandarmen uzaqmerzimdi jobalarda jumys isteýge múmkindik beredi. Eń bastysy – bul jaǵdaı oqýlyq daıyndaýdyń qarqyny men sapasyn teń ustaýǵa jol ashady. Bala tek «jattap alatyn» emes, túsinip, taldap oqıtyn kitappen jumys isteýi kerek.
– Mundaı nátıjege jetý úshin sózsiz birlik pen kásibı yntymaqtastyq qajet bolǵany belgili. Kimderdiń eńbegin erekshe atar edińiz?
– Bul – bir adamnyń emes, tutas salanyń jetistigi. Biz birlesip áreket ettik. Pozısııamyzdy ashyq aıtyp, kásibı argýmentter usyndyq. Osy tusta AmalBooks baspasynyń negizin qalaýshy Bahytjan Býharbaıdyń belsendiligin erekshe atap ótkim keledi. Ol birneshe jumys tobyna qatysyp, naqty usynystar ázirledi, sala atynan oryndy oı aıtty. Bul – kásibı adaldyqtyń úlgisi.
Sondaı-aq Májilis depýtaty Ashat Aımaǵambetovtiń bul máseleni júıeli túrde kóterýi, memlekettiń qulaǵyna jetkizýi úlken ról atqardy. Osyndaı jaýapkershiligi zor azamattardyń arqasynda salaǵa degen senim men serpin paıda boldy.
– Sońǵy suraq: endi qaı baǵytta ilgerileısizder?
– Eń aldymen, biz balalar men jasóspirimderge arnalǵan zııatkerlik ádebıetti damytýdy jalǵastyramyz. Bul – ulttyq sananyń, tarıhı jadymyzdyń, tildik mádenıetimizdiń ózegine aınalýy kerek baǵyt. Sonymen birge, mektep baǵdarlamasyna qosymsha oqý quraldaryn, avtorlyq ádistemelerdi damytýǵa kúsh salamyz.
Arman-PV – oqyrman men ustazdyń senimine ıe bolǵan baspa. Endi biz osy senimdi tereńdete otyryp, sapa men maǵyna qatar júretin jańa jobalarǵa jol ashamyz.