Qytaıdyń Úrimji qalasynda Ortalyq Azııa elderi men Qytaı Halyq Respýblıkasynyń bilim salasy mınıstrleri alǵash ret keńes ótkizdi.
Ortalyq Azııa elderi men Qytaı bilim salasyndaǵy baılanysty bekemdeýge nıetti. Úrimji qalasynda uıymdastyrylǵan keńeske Qazaqstan, Qyrǵyzstan, О́zbekstan, Tájikstan, Túrikmenstan elderiniń bilim jáne ǵylym salasyna jaýapty mınıstrleri men dıplomatııalyq ókilderi qatysty.
Elimizdiń delegasııasyn bastap barǵan Ǵylym jáne joǵary bilim mınıstri Saıasat Nurbek keńesti mańyzdy dıalog alańy retinde baǵalap, Qytaı tarapyna uıymdastyrý jumysyna rızashylyǵyn bildirdi. Mınıstr bilim salasyndaǵy óńirlik áriptestiktiń turaqty júıege aınalýyn qoldaıtynyn aıtyp, mundaı kezdesýlerdi dástúrli formatqa kóshirý qajettigin atap ótti.
Mınıstr sózinde elimizdiń Ortalyq Azııa men Qytaı elderi arasyndaǵy akademııalyq baılanysty nyǵaıtýǵa múddeli ekenin bildirip, bilim ıntegrasııasyn tereńdetý, akademııalyq utqyrlyqty keńeıtý men sıfrlandyrý baǵytyn qoldaıtynyn jetkizdi. Sonymen qatar, ol bilim berý sapasyn arttyrý, birlesken ǵylymı jobalardy júzege asyrý, kadr daıarlaýda ortaq tásilderdi qalyptastyrý qajettigin atap ótti.
Keńes barysynda qatysýshylar birlesken jumystyń qaǵıdattaryn aıqyndaıtyn arnaıy Jarǵyny qabyldady. Sonymen qatar bilim men ǵylym salasyndaǵy ózara yqpaldastyqqa ortaq nıetti bildiretin Úrimji deklarasııasyna qol qoıyldy.
Rotasııa tártibi boıynsha kelesi keńesti uıymdastyrý men tóraǵalyq etý mindeti Qazaqstan Respýblıkasyna tapsyryldy.
Bul keńes Ortalyq Azııa men Qytaı arasyndaǵy bilim qatynastaryn jańa mazmunmen tolyqtyryp, aımaqtaǵy maman daıarlaý, akademııalyq sapa jáne tehnologııalyq damý salalaryndaǵy yqpaldastyqty tereńdetýge jol ashady. Uzaqmerzimdi áriptestikke negizdelgen dıalog alańy – bolashaqta ulttyq bilim júıeleriniń ornyqty damýyna serpin beretin qadam.