Búgin Májilistiń jalpy otyrysynda depýtat Ulasbek Sádibekov Túrkistan oblysyndaǵy aýyl sharýashylyǵy salasynda qordalanǵan máseleler men sharýalardy qysqan qýańshylyq týraly sóz qozǵady, dep jazady Egemen.kz.
О́ńirdegi qýańshylyq pen zııankesterdiń kóbeıýi dıqandar men sharýalar úshin buryn-sońdy bolmaǵan qıyndyq týǵyzyp otyr. Depýtat bul jaǵdaı oblys turǵyndarynyń turmysyna ǵana emes búkil eldiń azyq-túlik qaýipsizdigine tikeleı qaýip tóndirip otyrǵanyn aıtty.
«Bıyl Túrkistan oblysynda aýa raıynyń qolaısyzdyǵy saldarynan egin alqaptarynyń biraz bóligi kúıip ketken. Jalpy egilgen 389,3 myń gektar alqaptyń 10 paıyzy jaramsyz kúıge túsken. Bul — josparlanǵan ónim kóleminiń aıtarlyqtaı tómendeýine ákelýi múmkin. Sonymen qatar, jaıylymdardyń qýraýy men mal azyǵynyń tapshylyǵy aýyl turǵyndarynyń turmysyn odan saıyn aýyrlatyp otyr. Mal basynyń azaıýy da tirshiligi tórt túlikke táýeldi óńir úshin úlken problemaǵa aınaldy», dedi Ulasbek Sádibekov.
Ol osy máselege Úkimettiń nazaryn aýdaryp, zardap shekken aýdandarda tótenshe jaǵdaı rejımin jarııalaý múmkindigin qarastyrýdy jáne qýańshylyq zardaptaryn eńserýge baǵyttalǵan arnaıy óńirlik baǵdarlama qabyldap, onyń aıasynda ǵylymı negizdelgen agroekologııalyq sheshimderdi júzege asyrý kerek ekenin atap ótti.
«Sondaı-aq «Agrarlyq nesıe korporasııasy» AQ arqyly kóktemgi dala jumystaryna berilgen nesıe qarajattary men «QazAgroQarjy» AQ arqyly 2023 jyldan beri lızıngke alynǵan tehnıkalar boıynsha nesıelerdiń qaıtarý merzimin 1 jylǵa shegerýdi usynamyn. Ońtústiktegi sharýalar «Agrarlyq nesıe korporasııasy» AQ tarapynan aýdandardaǵy nesıe seriktestikterine qoıylatyn talaptardy ońtaılandyrýǵa, jaýyp tastaǵan nesıe jelisin qaıta ashýǵa yqpal etýińizdi suraıdy», degen sharýalar tilegin jetkizdi.
О́ńirde zııankestermen kúres máselesi de ózekti bolyp otyr. Ulasbek Sádibekov osyǵan baılanysty keshendi óńirlik baǵdarlama ázirleýdi, Túrkistan oblysynyń tabıǵı-klımattyq erekshelikterin eskere otyryp, shegirtke men shirkeıge qarsy kúreske arnalǵan arnaıy óńirlik jospar qabyldaýdy da usyndy.
«Asa qaýipti zııandy organızmderge qarsy kúres sharalaryn jedel ári tıimdi júzege asyrý úshin óńdeýge jatatyn barlyq jer kólemin respýblıkalyq bıýdjetten 100% qarjylandyrý kerek. Aýyl sharýashylyǵy mınıstrliginiń Agroónerkásiptik keshendegi memlekettik ınspeksııa komıtetiniń asa qaýipti zııandy organızmderge qarsy kúres júrgizý quzyretin, tıisti qarjy kólemimen birge óńir ákimdikterine berýdi usynamyn», dedi depýtat.
Alına QAIRATQYZY,
EUÝ 2-kýrs stýdenti