Qazaqstan Respýblıkasy Parlamenti Senatynyń bastamasymen buqaralyq aqparat quraldary ókilderine arnalǵan dástúrli «Parasat» konkýrsyna ótinim qabyldaý bastaldy. Bul týraly Senat Tóraǵasy Máýlen Áshimbaev óziniń Facebook paraqshasynda jarııalady, dep habarlaıdy Egemen.kz.
«Jýrnalıster kúnine oraı Parlament Senaty uıymdastyratyn dástúrli «Parasat» baıqaýyna ótinimder qabyldana bastady. Baıqaýǵa Memleket basshysynyń reformalarynyń máni men olardyń iske asyrylýyn zańnamalyq turǵydan qamtamasyz etý jumystaryn halyqqa jetkizip, nasıhattap júrgen jýrnalıster, shyǵarmashylyq ujymdar jáne blogerler qatysa alady. Jumystardy qarap, saraptaý úshin konkýrstyq komıssııa quryldy. Onyń quramynda otandyq medıa salasynda aıqyn qoltańbasyn qaldyrǵan senatorlar – Nurtóre Júsip, Darhan Qydyráli, Bıbigúl Jeksenbaı, Aıgúl Qapbarova, Ásem Rahmetova jáne basqa da áriptester bar», dep jazdy Máýlen Áshimbaev.
Konkýrs jurtshylyqqa aqparat jetkizý men qoǵamdy memlekettik damý úderisine tartýǵa yqpal etetin kásibı jýrnalıstıkany qoldaý jáne yntalandyrý maqsatynda ótkizilip otyr. BAQ ókilderi usynatyn materıaldar Memleket basshysynyń tapsyrmalaryn iske asyrý barysyn jarııa etýge, Senatta talqylanatyn zańdar men olardyń ózekti máselelerdi sheshýge baǵyttalýyn kórsetýge arnalýy tıis. Sonymen qatar, Senat depýtattarynyń depýtattyq saýaldary arqyly óńirlik túıtkilderdi sheshýge atsalysý taqyrybyndaǵy materıaldar da qabyldanady.
О́tinimder 2025 jyldyń 10 maýsymyna deıin qabyldanady. Jumystar kelesi nomınasııalar boıynsha qarastyrylady:
Úzdik teledıdar materıaly
Úzdik radıo materıal
BAQ basylymyndaǵy úzdik jarııalanym
Internettegi úzdik jarııalanym
Áleýmettik jelidegi eń jaqsy aqparat
Úzdik taldamalyq materıal (arnaıy nomınasııa)
Materıaldar Senat_Press@parlam.kz elektrondyq poshtasyna joldanýy tıis. Anyqtama telefondary: 74-71-37, 74-72-27. Jeńimpazdardy marapattaý rásimi Buqaralyq aqparat quraldary qyzmetkerleri kúni qarsańynda ótedi.
Konkýrs sharttary týraly tolyq aqparatty Senattyń resmı saıtynan alýǵa bolady: https://senate.parlam.kz/kk-KZ/contests/parasat
Qurmetpen, Baspasóz qyzmeti Baılanys: 8 (7172) 74-72-24
Damıra Tólegen
EUÝ stýdenti