Úkimet qaýlysymen 2024 jyly elimizde zańsyz oıyn bıznesi men lýdomanııaǵa qarsy is-qımyl jónindegi 2024-2026 jyldarǵa arnalǵan keshendi jospar bekitilgen. Týrızm jáne sport mınıstrligi jospar aıasynda atqarylyp jatqan jumystardy qorytyndylady, dep jazady Egemen.kz.
Jospar 4 negizgi baǵyt pen 28 naqty is-sharadan turady. Onyń ishinde mańyzdy baǵyttardyń biri – lýdomanııanyń aldyn alý.
Respýblıkalyq deńgeıde júrgizilgen áleýmettik zertteý barysynda qumar oıyndarǵa beıimdiliktiń sebepteri men taralý aýqymy anyqtalyp jatyr. Saýalnamaǵa elimizdiń barlyq óńirinen 5 998 azamat qatysqan. Sonymen qatar oıyn bıznesi salasyndaǵy jáne oǵan janama qatysy bar 20 sarapshymen suhbattar ótkizilgen.
Zertteý nátıjeleri boıynsha elimizde qumar oıyndarǵa táýeldi azamattardyń boljamdy sany anyqtaldy:- lısenzııasy bar kazıno men oıyn avtomattary zalyna – 459 444 adam;- ınternet-kazınoǵa (elimizde tyıym salynǵan) – 484 055 adam;- lısenzııasy bar býkmekerlik keńselerge – 456 276 adam;- lısenzııasy joq býkmekerlik keńselerge – 494 019 adam;- zańdy lotereıa ónimderine – 491 710 adam táýeldi.
Sondaı-aq, bilim berý mekemelerinde qyzmet etetin 800-den astam pedagog pen psıholog úshin arnaıy oqytý uıymdastyrylyp, lýdomanııamen kúresýdiń negizgi tásilderi túsindirilgen. 6 000-nan astam mektep óziniń tárbıe jumysynyń josparyna qumar oıyndar men ınternetke táýeldiliktiń aldyn alýǵa arnalǵan bólim engizgen.Mektepter janynan «Ata-analardy pedagogıkalyq qoldaý» ortalyqtary qurylyp, 1-11 synyp oqýshylarynyń ata-analaryna arnalǵan arnaıy baǵdarlama aıasynda aıyna eki ret ótetin, jalpy sany 24 sabaqtan turatyn kýrs qolǵa alynǵan.
Qoǵamnyń ártúrli toptaryn qamtıtyn túsindirý jáne aǵartý sharalary
Qazaqstan Musylmandary dinı basqarmasy men basqa da dinı birlestikterdiń qoldaýymen qumar oıyndardyń zııany týraly 1 mıllıonnan astam azamatty qamtyǵan 4 000-nan astam is-shara ótkizilgen.Ǵylym jáne joǵary bilim mınıstrligi jelisi boıynsha 2024 jyly jastar arasynda salamatty ómir saltyn nasıhattaýǵa baǵyttalǵan «Salamatty ómir salty úshin!» fleshmoby, Densaýlyq festıvali, «Birinshi kýrs stýdenti» spartakıadasy sııaqty 400-den astam is-shara uıymdastyrylǵan.Qorǵanys mınıstrligi tarapynan áskerı bólimder men mekemelerde 38 dóńgelek ústel, 7 konferensııa, 14 jınalys, 16 919 áskerı qyzmetshimen jeke suhbat jáne áńgimelesý ótkizilgen.