QR Densaýlyq saqtaý mınıstrliginiń Sanıtarııalyq-epıdemıologııalyq baqylaý komıteti azyq-túlik ónimderindegi qorektik zattardyń arnaıy profılin ázirleýge kiristi. Bul bastama juqpaly emes aýrýlardyń aldyn alý maqsatynda qolǵa alynǵan, dep habarlaıdy Egemen.kz.
Vedomstvo taratqan málimetke sáıkes, qorektik zattar profılin anyqtaý – bul quramynda artyq qant, tuz jáne transmaılar bar óńdelgen azyq-túlikterdi júıeleý men jikteýdiń ádisi. Mundaı tásil halyq, ásirese balalar arasynda aýrýlardyń aldyn alýǵa baǵyttalǵan.
«Azyq-túlik ónimderiniń marketıngi semizdikke ákeletin orta qalyptastyratyn mańyzdy faktor bolyp tabylady. Ol durys emes tamaqtaný daǵdylaryn nasıhattap, tutynýshylardyń talǵamyna áser etedi. Balalar men jasóspirimder jıi fastfýd, tátti sýsyndar, kondıterlik ónimder jáne daıyn tańǵy astar sııaqty maı, qant jáne tuzy kóp ónimderdi jarnamalaýshy kompanııalardyń nysanasyna aınalady», delingen komıtet habarlamasynda.
Dúnıejúzilik densaýlyq saqtaý uıymy (DDSU) azyq-túlik ónimderiniń balalarǵa baǵyttalǵan marketınginiń zııandy áserin moıyndap, zııandy taǵamdar men alkogolsiz sýsyndarǵa qatysty jarnamaǵa shekteý qoıý boıynsha usynymdar ázirlegen. Osy usynymdarǵa súıene otyryp, QR Densaýlyq saqtaý mınıstrligi 2025–2026 jyldarǵa arnalǵan «Durys tamaqtanýdy ilgeriletý» jol kartasyna sáıkes naqty sharalardy iske asyrýdy bastaǵan.
«Qorektik zattar profılin ázirleý arqyly quramynda qanyqqan maılar, transmaı qyshqyldary, bos qanttar men tuz mólsheri joǵary ónimderdiń marketınginiń aýqymy men sıpatyn baqylaýǵa jáne baǵalaýǵa múmkindik týady. Budan ári ondaı jarnamany shekteý sharalary qolǵa alynady», delingen habarlamada.