Astanada ótken el kýbogin grek-rım kúresi sheberleri qorytyndylady. Jarystyń jalpykomandalyq esebinde jergilikti balýandar kósh bastady. Almaty oblysy ekinshi, qostanaılyqtar úshinshi orynǵa ıe boldy.
60 kg salmaq dárejesinde Aıdos Sultanǵalıǵa teń keler eshkim tabylmady. Álem chempıonatynda eki márte qola medal oljalaǵan oǵylan bul joly da óziniń myqtylyǵyn moıyndatty. Sheshýshi beldesýde Syr boıynyń sańlaǵy kánigi qarsylasy jetisýlyq Ǵalym Qabdýnasarovty jeńdi. Aıdostyń komandalyq áriptesi Alpamys Dastanbek 55 kg salmaqta top jardy.
Qostanaı oblysy ókilderi arasynan Iýsýp Masıev (97 kg) pen Mansýr Shadýkaevtyń (130 kg) mereıi ústem boldy. Masıev aqtyq synda shyǵysqazaqstandyq Salaýat Ahmetqalıdi jeńdi. Mansur fınalda Almaty oblysynyń sportshysy Aqarys Berdashovtan basym tústi. Taǵy bir altyndy fınalda soltústik óńirden kelgen Danııar Qalenovti qapy qaldyrǵan astanalyq Mereı Máýletqanov (72 kg) oljalady.
63 kg salmaqta almatylyq Erkebulan Ardaqovtyń aıy ońynan týdy. Fınalda ol jarys qojaıyny Asaýhat Muhamadıevtiń óreskel qateligin utymdy paıdalandy. «Qazaqstan» sport keshenine jınalǵan jankúıerler 67 kg salmaq dárejesinde 2023 jylǵy jastar arasyndaǵy (U-23) álem birinshiliginiń jeńimpazy, Azııa chempıony, Jambyl oblysynyń ókili Sultan Ásetuly jeńimpaz dep tanyldy. Tarazdan kelgen taǵy bir balýan Talas Áshirhanov 77 kg salmaqta aldyna jan salmady. 82 kg salmaqta Almır Tólebaev top jardy. Fınalda ol Almaty oblysynyń ókili, tájirıbeli Qaharman Qısmetovti qapy qaldyrdy.
87 kg salmaqtyń fınaldyq saıysynda astanalyq Maqsat Saılaý men soltústikqazaqstandyq Islam Evloev kúsh synasty. Beldesýdiń aıaqtalýyna 10 sekýnd qalǵanda Islam qarsylasyn keýdesinen asa laqtyryp, aıqyn jeńiske qol jetkizdi.