«Modeldik sıfrlyq fabrıkalar» jobasy kásiporyndardyń básekege qabilettiligin arttyrýǵa jáne olardy Indýstrııa 4.0 ıntegrasııasyna baǵyttalǵan Qazaqstan ónerkásibiniń sıfrlyq transformasııasynyń negizgi baǵyttarynyń biri bolyp tabylady, dep jazady Egemen.kz.
Qazaqstan Respýblıkasynyń óńdeýshi ónerkásibin damytýdyń 2023-2029 jyldarǵa arnalǵan tujyrymdamasyna sáıkes MDF jobasy sıfrlandyrý múmkindikteri men tehnologııalardy engizý tıimdiligin kórsetetin pılottyq kásiporyndar negizinde sıfrlyq sheshimderdi engizýge baǵyttalǵan.
2018 jyldan bastap úlgilik sıfrlyq zaýyt retinde kelesi kásiporyndar tańdaldy: «AK Altynalmas» AQ, «Hımfarm» AQ, «Evrazıan Fýds» AQ, «Almaty jeldetkish zaýyty» JShS, «Bal Tekstıl» JShS jáne «Karlskrona LC AB» JShS.
Árbir kásiporyn úshin sıfrlandyrýdyń jol kartalary ázirlendi, onyń ishinde sıfrlyq tehnologııalardy engizý, prosesterdi avtomattandyrý jáne sıfrlyq sheshimderdi biriktirý sharalary bar.
Osy jol kartalary aıasynda 45 sıfrlyq joba júzege asyrylýda. 2024 jyldyń aıaǵyna deıin 31 joba tolyǵymen iske asyryldy, 14-i iske asyrý satysynda. Sıfrlyq sheshimderdi engizý nátıjesinde ónimdilik 15-30%-ǵa artty, aqaýlardan bolatyn ysyraptar 12%-ǵa azaıdy, operasııalardyń 60%-ǵa deıini avtomattandyryldy, jóndeý shyǵyndary 20%-ǵa qysqardy. Eń sátti sıfrlandyrýdy jol kartalary tolyǵymen oryndaǵan «Hımfarm» AQ jáne «Bal Tekstıl» JShS sııaqty kásiporyndar aıaqtady.
Mysaly, «Bal Tekstıl» JShS josparlanǵan 6 jobany sátti júzege asyrdy, sonyń ishinde prosesterdiń reınjınırıngi, ERP júıesi, sapany baqylaýdyń sıfrlyq sheshimderi, qyzmetkerlerdi oqytý júıesi jáne ónimdi qadaǵalaý bar.
«Hımfarm» AQ barlyq 6 sıfrlyq jobany júzege asyrýdy tolyǵymen aıaqtady: bulttyq HR, óndiristik derekterdi vızýalızasııalaý, predıktıvtik jóndeý (SAP TOPO), sıfrlyq ınjenerlik ortalyq, toptamalaý jáne biriktirý, sondaı-aq sapany baqylaý júıesi (QA Power Map).
«AK Altynalmas» altyn óndirý kásiporny 12 sıfrlyq jobanyń 10-yn júzege asyrdy, onyń ishinde IT ınfraqurylymyn qurý, jerasty jabdyqtaryn avtomattandyrý, jumysqa tapsyrysty basqarý júıesin engizý, ortalyq dıspetcherlik keńse, ashyq jáne jerasty taý-ken jumystaryn dıspetcherleý.
«Almaty jeldetkish zaýyty» JShS málimetter bazasyn sıfrlandyrý, ERP júıesi, Kaızen prosesteri jáne ónimdi qadaǵalaý boıynsha barlyq josparlanǵan 4 jobany júzege asyrdy.
«Karlskrona LC AB» JShS 6 jobanyń 5-in aıaqtady, onyń ishinde CRM, quıý tehnologııalyq prosesin boljaý júıesi, ónimdi 3D modeldeý jáne elektrondy oqytý júıesi.
«Evrazıan Fýds» AQ josparlanǵan 7 jobanyń 4-in júzege asyrdy, onyń ishinde oqý ortalyǵy, predıktıvtik jóndeý (SAP TOPO, 1 kezeń), energııa menedjmentin engizý, sapa menedjmentin ishinara avtomattandyrý.