Ulttyq kınony qoldaý memlekettik ortalyǵy bıyl memleket qoldaýyna úmitker kınojobalar tanystyrylymy (pıtchıng) bastalǵanyn habarlaıdy. Ashyq qorǵaý 9–12 maýsym aralyǵynda Almaty qalasynda ótedi. Pıtchıngke baıqaýdyń eki kezeńinen sátti ótken 99 joba qatysyp jatyr.
Tanystyrylymnyń ashylýynda Ulttyq kınony qoldaý memlekettik ortalyǵynyń basqarma tóraǵasy Qurmanbek Jumaǵalı atalǵan kezeńniń salmaǵyna toqtaldy.
«Búgingi tanystyrylymda Saraptama keńesi ulttyq kınoǵa súbeli úles qosatyn jobalardy irikteý úshin bar kúshin salady degen senimdemiz. Ulttyq kıno – ulttyń rýhanı kelbeti. Sondyqtan memleket qarjysyna túsiriletin fılmderdiń mazmuny men sapasy joǵary deńgeıde bolýǵa tıis. Kınogerler bul jaýapkershilikti tereń túsinedi dep oılaımyz. Biz ashyq konkýrs ótkizýge múddelimiz. Barlyq úderis tıisti sala – Mádenıet jáne aqparat mınıstrliginiń baqylaýynda», dedi Q.Jumaǵalı.
Al Saraptama keńesiniń tóraǵasy Baýyrjan Shókenov kásibı jáne ádil baǵalaýdyń mańyzyn erekshe atap ótti.
«Árbir jobany muqııat qarap, onyń ıdeıalyq mazmuny men dramatýrgııalyq sapasyn baǵalaımyz. Memlekettik qoldaýǵa laıyq, mazmuny baı ári bolashaǵy zor jumystar irikteledi dep úmittenemiz. Barlyq baǵalaý kezeńderi bekitilgen talaptarǵa saı ádil ótedi», dedi B.Shókenov.
Esterińizge sala keteıik, baıqaýǵa ótinim qabyldaý 13 naýryzda aıaqtaldy. Bıyl kórkem, derekti jáne anımasııalyq fılm seksııalarynda barlyǵy 444 ótinim kelip tústi. Onyń ishinde 357 joba Saraptama keńesiniń qaraýyna jiberildi. Baǵalaý nátıjesinde 128 ssenarıı men ssenarıı jospary ekinshi kezeńge ótti. Qujattardyń tolyq paketin tapsyrǵan soń 99 joba pıtchıngke joldama aldy.