Prezıdenttik «Altyn sapa» syılyǵy 20 jyldan beri otandyq bıznestegi úzdikterdi anyqtap kele jatyr. Syılyq 4 atalym boıynsha berilip, óndiristik maqsattaǵy eń jaqsy kásiporyn; halyqqa taýar shyǵaratyn úzdik kásiporyn; eń jaqsy qyzmet kórsetýshi; azyq-túlik ónimin nemese aýyl sharýashylyǵy ónimderin shyǵaratyn úzdik kásiporyndy daralaıdy.
Saýda jáne ıntegrasııa mınıstrligindegi Strategııalyq josparlaý jáne halyqaralyq yntymaqtastyq basqarmasynyń basshysy Gúlnar Iаshkınanyń aıtýynsha, baıqaý – ótinimderdi qabyldaý, saraptamalyq baǵalaý, oqıǵa ornynda tekserý, komıssııanyń qorytyndy sheshimi syndy 4 kezeńnen turady. Júldeger uıym konkýrs logotıpin 4 jyl boıy jarnamalyq maqsatta paıdalaný quqyǵyna jáne 450 AEK kóleminde aqshalaı syılyqqa ıe bolady. Baıqaýǵa qatysýdyń ekonomıkalyq áseri zor. О́tken jyldardaǵy málimetterdi taldaý marapatqa ıe bolǵan kompanııalardyń jyldyq kirisin orta eseppen 2,7 ese arttyratynyn kórsetedi. Eń kóp ósim tutyný taýarlaryn óndirýshiler (+2 ese) men ónerkásiptik kásiporyndar (+1,7 ese) arasynda baıqalǵan.
«Altyn sapamen» qatar «Qazaqstannyń úzdik taýary» respýblıkalyq baıqaýy men kórmesi de ótkizilip júr. Onda úzdik ónimder 3 atalym boıynsha tańdalady – ónerkásip taýarlary, halyqqa arnalǵan taýarlar, azyq-túlik ónimderi. Baıqaýǵa qujat qabyldaý 27 aqpanda bastalyp, 1 shildede aıaqtalady. Qujatty baıqaýdyń resmı saıty (www.altynsapa.kz) arqyly tapsyrýǵa bolady. Fınalda qatysýshylar saraptamalyq tekserýden ótedi, odan keıin Prezıdent ákimshiligi janyndaǵy komıssııa 14 jeńimpazdy anyqtaıdy.
«Altyn sapa» – ónim men kórsetiletin qyzmet sapasyn arttyrýda, sapa menedjmenti júıesin tıimdi engizýde joǵary nátıjege qol jetkizgen uıymdardy anyqtap, marapattaýǵa arnalǵan. «Qazaqstannyń úzdik taýary» – otandyq taýar óndirýshilerdi qoldaý, ónim sapasyn jaqsartý men ishki naryqty sapaly, básekege qabiletti ónimdermen qamtý maqsatynda ótkiziledi», deıdi «Atameken» UKP respýblıkalyq konkýrstar men syılyqtardy uıymdastyrý jónindegi basqarýshy dırektory Mereı Isaeva.
Bıylǵy «Altyn sapa» syılyǵy men «Qazaqstannyń úzdik taýary» kórme-baıqaýyna qatysý úshin óńirlik deńgeıde oqytý semınarlary uıymdastyrylyp, bıznes ókilderine konkýrstyń ótkizilý tártibi, talaptary men artyqshylyǵy jan-jaqty túsindirilip jatyr. Almaty, Jetisý, Qyzylorda, Jambyl, Qaraǵandy, Atyraý, Aqtóbe, BQO, Qostanaı, Túrkistan oblystary men Astana, Shymkent qalasynda ótken semınarlarǵa jalpy sany 300-ge jýyq kásipker qatysty.
«Qatysýshylar kásipkerlikpen neshe jyl aınalysý kerek, memleket úlesi qansha bolýǵa tıis, sheteldik kompanııalardyń qatysý múmkindigi jáne jeńiske jetken jaǵdaıda qandaı yntalandyrý sharalary qarastyrylǵany týraly saýaldardy jıi qoıdy», dedi «Altyn sapa» baıqaýynyń laýreaty, «ADILI» brendiniń negizin qalaýshy Indıra Ádil.
«Baıqaýlar kásiporyndardyń halyqaralyq deńgeıge shyǵýyna da jol ashady. Sarapshylar kompanııanyń menedjment júıesi, eksporttyq áleýeti, jergilikti qamtý úlesi men memlekettik organdar tarapynan shaǵymdardyń bolmaýyna erekshe nazar aýdarady», dedi Mereı Isaeva.
5 naýryz ben 22 mamyr aralyǵynda «Altyn sapa» konkýrsyna qatysýǵa 104 sýbekti, «Qazaqstannyń úzdik taýary» baıqaýyna 279 shaǵyn jáne orta bıznes sýbektisi ótinim berip úlgergen.