Shaǵyn jáne orta kásipkerlikti damytý Qazaqstan úkimeti alǵa qoıǵan negizgi maqsat pen basym baǵyttardyń biri. Osyǵan baılanysty bıyl Shymkent qalasynda 260 azamatqa 400 aılyq eseptik kórsetkishke (AEK) deıingi qaıtarymsyz grant berý josparlanyp otyr. Bul soma – 1 mln 572 800 teńgeni quraıdy. О́tinim qabyldaý respýblıka kóleminde 21 mamyr men 3 maýsym aralyǵynda portal arqyly onlaın túrde ótken bolatyn, dep habarlaıdy Egemen.kz.
О́z kezeginde ótinim bergen úmitkerler ózderiniń bıznes-jobalaryn 9-19 maýsym aralyǵynda komıssııa aldyna jeke shyǵyp qorǵap shyǵý kerek. Al komıssııa quramyna qalalyq máslıhat depýtattary, qoǵamdyq keńes músheleri, jýrnalıster men kásipkerler enip otyr. Jobalardy súzgiden ótkizetin komıssııa músheleri birinshiden onyń ómirsheńdigine, úmitkerdiń sol saladaǵy tájirıbesine, keleshekte ol jobamen qansha jumys oryndaryn ashýǵa bolatynyna, sondaı-aq jobanyń óndiristik áleýetine nazar aýdarýy tıis.
Aıta ketken jón 2024 jyly Shymkent qalasy boıynsha qaıtarymsyz grant 428 turǵynǵa maquldandy. Komıssııa oń sheshim shyǵarǵan bıznes bastamalardyń ishinde mal jáne qus sharýashylyǵyna-44, qyzmet kórsetý salasyna-100, kondıter jáne nan ónimderine-56, tigis tigýge-84, jartylaı fabrıkattar óndirisine-31, jıhaz jasaýǵa-8, jalpy óndiris salasyna-62 jáne qoǵamdyq tamaqtaný ornyn ashýǵa-43 joba arnaldy.
Jaýapty sala mamandarynyń aıtýynsha bıyl áleýmettik osal toptardan 934 azamat ótinim tapsyrypty. Al konkýrs barysynda komıssııa otyrysynyń ashyqtyǵyn qamtamasyz etý úshin áleýmettik jelilerdiń resmı paraqshalary arqyly tikeleı efırler uıymdastyrylady. Osy tusta eskerer bir jáıt qaıtarymsyz grant qarjysy nesıeni óteýge, jyljymaıtyn múlik satyp alýǵa, alkogol, temeki sekildi aksızdeletin ónimder shyǵarýǵa berilmeıdi.
Shymkent