Memlekettik keńesshi Erlan Qarın «Ortalyq Azııa – Qytaı» gýmanıtarlyq forýmyna qatysty.
Astanada «Ortalyq Azııa – Qytaı» ekinshi sammıti aıasynda ótip jatqan gýmanıtarlyq forýmnyń jumysy bastaldy. Is-sharany bas dırektor Shen Haısıýn myrza bastaǵan Qytaı Medıakorporasııasy men Qazaqstan Respýblıkasy Prezıdentiniń Teleradıokesheni uıymdastyrdy. Forým jumysyna Qazaqstan, Qytaı, Qyrǵyzstan, Tájikstan, Túrikmenstan jáne О́zbekstan elderiniń memlekettik organdary men jetekshi medıaqurylymdarynyń basshylary qatysty.
Memlekettik keńesshi Erlan Qarın Qazaqstan Respýblıkasynyń Prezıdenti Qasym-Jomart Toqaevtyń quttyqtaý hatyn oqyp berdi.
«Qazaqstan men Qytaı arasyndaǵy yntymaqtastyq tatý kórshilik jáne máńgi dostyq rýhynda damyp keledi. Tereńnen tamyr tartatyn shynaıy seriktestigimiz búginde strategııalyq sıpat alyp, múlde jańa deńgeıge kóterildi. Mádenıet – halyqtar men órkenıetterdi jalǵaıtyn altyn kópir. Eki eldiń birligin bekemdeý jolynda mádenı-gýmanıtarlyq baılanystar aıryqsha ról atqarady. Sondyqtan biz osy baǵyttaǵy ózara yntymaqtastyǵymyzdy kúsheıtýge erekshe mán beremiz», delingen hatta.
Sondaı-aq Memlekettik keńesshi elimizde Prezıdent Qasym-Jomart Toqaevtyń basshylyǵymen áleýmettik-ekonomıkalyq, saıası jáne mádenı-gýmanıtarlyq salalarda júzege asyrylyp jatqan mańyzdy reformalarǵa toqtaldy.
Erlan Qarın atalǵan forým Ortalyq Azııa elderi men Qytaı arasyndaǵy mádenı-gýmanıtarlyq yntymaqtastyqty nyǵaıtýǵa tyń serpin beretinine senim bildirdi.