Quqyqtyq saýat deńgeıin arttyrý – ýaqyt talaby. Zań normalaryn bilý – árbir azamattyń quqyǵyn qorǵaýdyń negizi. Osy oraıda elimizde júıeli túrde ótkizilip kele jatqan «Halyq zańgeri» respýblıkalyq aksııasy erekshe mańyzǵa ıe. Bul alǵash ret 2013 jyldyń qyrkúıek aıynda Almaty qalasynda ótti. Bul bastamanyń negizin qalaǵan – zańger Mıhaıl Klenchın, al qoldaý kórsetken – «Paragraf» aqparattyq júıesi.
2016 jyldan bastap aksııa respýblıkalyq deńgeıge kóterilip, elimizdiń barlyq iri qalasynda jyl saıyn ótkizilip keledi. Astana qalasynda alǵash 2016 jyly ótip, búginge deıin 9 ret uıymdastyryldy. Jaqynda kezekti aksııa sátti ótti.
Is-sharaǵa 30-ǵa jýyq memlekettik organ ókilderi, kásibı zańgerler, advokattar men notarıýstar, sondaı-aq tájirıbeli quqyq qorǵaýshylar qatysty. Jıynnyń basty maqsaty – turǵyndarǵa quqyqtyq keńes berý, óz máselesin sheshýge jol kórsetý, qujattaryn túsindirý jáne zańdy turǵyda durys baǵyt kórsetý.
Qatysýshylarǵa erekshe kóńil kúı syılaý maqsatynda kireberiste kelýshilerdi «Aliya Bulat» óner ortalyǵynyń jarqyn kostıým kıgen anımatorlary qarsy aldy. Bul ásirese balalardyń kóńilin kóterip, is-sharaǵa jyly atmosfera syılaǵandaı boldy. Kelýshiler qatarynda zeınetkerler, múgedektigi bar azamattar, jumyssyzdar jáne kópbalaly analar da az emes. Keńes berý aımaqtary jer máseleleri, otbasy quqyǵy, áleýmettik máseleler, turǵyn úı zańnamasy, eńbek jáne kásipkerlik quqyǵy boıynsha birneshe sektorǵa bólingen.
«Men birneshe aı boıy jer telimin zańdastyra almaı júr edim. Búgin keńes alyp, naqty qaı mekemege, qandaı qujatpen barý kerektigin túsindim. Osyndaı tegin kómekke qol jetkizgenime óte qýanyshtymyn», deıdi qala turǵyny Aıdyn Manat.
Memlekettik organ ókilderi azamattardy qabyldap, naqty usynystar berdi. Zańgerler kez kelgen quqyqtyq suraqqa shynaıy ári kásibı jaýap berýge tyrysty. Kelýshilerdiń kóbi alǵash ret zańgerge júgingenin aıtyp, mundaı is-sharanyń jıi ótýin surady. Bul aksııa – halyq pen bılik arasyndaǵy senimdi arttyratyn, zańdy túsindirýdi jeńildetetin, quqyqtyq kómekke qoljetimdilikti qamtamasyz etetin mańyzdy bastama.
«Halyq zańgeri» aksııasy qoǵamdaǵy quqyqtyq mádenıettiń qalyptasýyna zor yqpal etedi degen senimdemiz.
«Eń aldymen aıtarymyz: zań kómegine júginý – jaýapty azamattyń parasatty qadamy. О́kinishke qaraı, kópshilik zańgerlerdi tek sotta nemese basqa da qıyn jaǵdaıda ǵana kerek dep sanaıdy. Al shyn máninde, ýaqtyly alynǵan keńes kúrdeli máselelerdiń aldyn alýy múmkin. Biz «Halyq zańgeri» sııaqty aksııalardy dál osy halyq pen quqyqtyq júıe arasyndaǵy kedergilerdi joıý úshin ótkizemiz. Eger sizde suraq, kúmán nemese jaı ǵana keńes qajet bolsa, kelińiz. Biz árqashan kómektesýge daıynbyz», deıdi aksııany uıymdastyrýshylar.
Dildana NURDILDA,
L.N.Gýmılev atyndaǵy EUÝ-dyń 3-kýrs stýdenti