ASTANA. 22 maýsym. Ǵaryshkerlerdi daıarlaý ortalyǵynyń vedomstvoaralyq komıssııasy qazaqstandyq ǵaryshker Aıdyn Aıymbetovty brıtandyq ánshi Sara Braıtmannyń ornyna Halyqaralyq ǵarysh stansasyna ushýǵa qatysýshy retinde bekitti. Bul týraly «QazAqparat» habarlady.
«Vedomstvoaralyq komıssııanyń sheshimimen Aıymbetov HǴS-yna qysqa merzimdik ekspedısııasynyń quramyna engizildi. Onyń dýbleri bolyp reseılik ǵaryshker Sergeı Prokopev taǵaıyndaldy», – dedi atalǵan agenttiktiń ókili jýrnalıstke bergen suhbatynda.
Ǵaryshqa ushýǵa úmitker bolǵan reseılik bıznesmen Fedor Galchev, áńgimelesýshiniń naqtylaýynsha, ǵaryshqa ushý ıdeıasynan bas tartqan joq. Biraq ázirge osyndaı saparǵa shyǵýǵa jetkilikti túrde daıyn emes ekenin túsinip otyr.
Buǵan deıin Rosǵarysh basshysy Igor Komarov TASS agenttigine HǴS-na ushýdan bas tartqan Braıtmannyń ornyna ushatyn adam taıaý ýaqytta anyqtalatynyn habarlaǵan edi.
Aıymbetov pen Galchevtan basqa, "Soıýz TMA-18M" kemesinde brıtandyq ánshiniń ornyna ushý tájirıbesi bolmaǵan Prokopev úmitker bolǵan.
"Soıýz TMA-18M" ǵarysh kemesiniń Baıqońyr (Qazaqstan) ǵarysh aılaǵynan ushýy 1 qyrkúıekke josparlanǵan. Aıymbetovpen bir ekıpajda orbıtaǵa reseılik ǵaryshker Sergeı Volkov pen eýropalyq astronavt Andreas Mogensen ushady.
Aıta keteıik, Aıdyn Aqanuly Aıymbetov 1972 jylǵy 27 shildede Almaty oblysynyń Taldyqorǵan qalasynda týǵan. 1993 jyly Armavırdegi joǵarǵy áskerı avıasııalyq ýchılısheni "joıýshy-ushqysh" mamandyǵy boıynsha bitirgen.
Qazaqstan Respýblıkasy Áskerı-áýe qyzmetiniń polkovnıgi (2014 jyldan).
2002 jyly Reseı-Qazaqstan memleketaralyq birlesken ǵaryshqa ushý kelisimi aıasynda Máskeý qalasynda medısınalyq komıssııadan ótti. 12.10.2012 jylǵy Qazaqstan Respýblıkasy Úkimetiniń №1304 qaýlysy negizinde Qazaqstan Respýblıkasynyń ǵaryshkeri dárejesi berildi.
Talǵat Raıymbek.
Derek, sýret: «QazAqparat».