Jýyrda elordadaǵy S.Seıfýllın atyndaǵy Qazaq agrotehnıkalyq zertteý ýnıversıtetinde belgili ǵalym, professor Shıdaý Imanǵajın atyndaǵy aýdıtorııa ashyldy. Oǵan ǵalymmen birge qyzmet istegen áriptesteri men shákirtteri, týǵan-týysqandary qatysty.
Saltanatty is-sharanyń ashylýynda ýnıversıtet rektory, akademık Qanat Tireýov ekonomıka ǵylymy salasynda ónegeli iz qaldyrǵan Sh.Imanǵajınniń eńbegin erekshe atap ótti.
«Bul aýdıtorııa – bilim men ǵylymǵa arnalǵan ǵımarat ǵana emes, ulaǵatty ustazdyń rýhyna qurmet. Ol óziniń ǵylymǵa degen adaldyǵymen shákirtteriniń júreginen jol tapqan tulǵa», dedi ol.
Sondaı-aq atalǵan joǵary oqý ornynda onymen birge qyzmet istegen ekonomıka ǵylymdarynyń doktory, professor Jasqaırat Súndetuly, aýyl sharýashylyǵy ǵylymdarynyń doktory, professor Aıtbaı Bulashev, t.b. azamattar sóz alyp, ǵalymnyń eńbekteri men oqytýshylyq qyzmeti týraly jyly estelikterimen bólisti.
Sh.Imanǵajın 1954 jyly sol kezdegi Lenıngrad qarjy-ekonomıkalyq ınstıtýtty bitirip kelgennen keıin, bar sanaly ómirin aýyl sharýashylyǵy ekonomıkasyna arnady. Osy baǵytta kandıdattyq dıssertasııasyn qorǵady. 1967 jyldan bastap, ómiriniń sońyna deıin qazirgi Qazaq agrotehnıkalyq zertteý ýnıversıtetine qyzmet istedi. Biraz jyl ekonomıka fakýltetiniń oqytýshysy, dekany boldy. Statıstıka kafedrasyn basqardy.
Ǵalymnyń kózi tirisinde 60-tan astam ǵylymı, ádistemelik jáne oqý quraly jaryq kórgen. Onyń ishindegi stýdentterge arnalǵan 5 oqý quralyn aıryqsha aıtýǵa bolady. 1989 jyly professordyń 1 oqý quraly álemdik kitaphana arqyly AQSh-ta jarııalanǵan. Budan bólek, ol naryqtyq ekonomıka, statıstıka jáne sıfrlyq transformasııa salasynyń damýyna eleýli úles qosty.
Bir sózben aıtqanda, uzaq jyl boıy ǵylym men oqytýshylyq qyzmetti qatar alyp, shákirt tárbıelegen Sh.Imanǵajın atyndaǵy aýdıtorııa bolashaq ekonomıka mamandarynyń bilim ordasyna aınalmaq.
Alııa ISMAILOVA,
ekonomıka ǵylymdarynyń kandıdaty, dosent