QOSTANAI. 04 shilde. Qazaqstan Respýblıkasy Memlekettik qyzmet jáne sybaılas jemqorlyqqa qarsy is-qımyl agenttigi Qostanaı oblystyq departamentiniń jedel tergeý toby qala ákiminiń taǵy bir orynbasary Arakelıan Frýnzıkti ustady. Bul týraly tobolinfo.kz saıtyna silteme jasaǵan egemen.kz tilshisi habarlady.
Sybaılas jemqorlyqqa qatysy bar degen kúdikpen Arakelıana Frýnzıkti jedel top qyzmetkerleri kúndiz jumys kezinde ustady. Onyń kabınetine tintý júrgizildi. Sonymen qatar qalalyq ákimshiliktiń birqatar qyzmetkerlerinen jaýap alyndy. Bul tergeý jumystary osynyń aldynda úsh kún buryn ustalǵan qala ákiminiń orynbasary Maqsut Qalıev pen «Syl» JShK-niń dırektory Gagık Ovnanıannyń ústinen qozǵalǵan qylmystyq iske baılanysty júrgizildi.
Qozǵalǵan qylmystyq ister babyna sáıkes qala ákiminiń orynbasarlary Maqsut Qalıev pen Arakelıan Frýnzıkti 7-den 12 jylǵa deıin bas bostandyǵynan aıyrylý nemese alǵan paraǵa 70 ese kólemde aıyppul tóleý jazasy kútip tur. Olardyń múlki tárkilenip, memlekettik qyzmetten birjolata alastatý da jaza quramyna kiredi. Al para bergen Ovnanıan Gagık bes jylǵa bas bostandyǵynan aıyrylýy nemese bergen parasyna 30 ese kóp aıyppul tóleýi múmkin. Qostanaı qalasynyń ákimi Ahmedbek Ahmetjanov otstavkaǵa ketýi ábden yqtımal.
Názıra Járimbetova
Derek, sýret: tobolinfo.kz.