Búgin elordamyzda «Astana Tazalyq» seriktestiginiń bastamasymen jýrnalısterge arnalǵan baspasóz týry ótti, dep jazady Egemen.kz.
Elordanyń ekologııalyq kún tártibindegi ózekti máseleniń biri – sanıtarlyq tazalyqty kúsheıtý jáne kommýnaldyq qyzmetterdiń ashyqtyǵy – osy is-sharanyń basty arqaýyna aınaldy. Aýqymdy is-sharaǵa BAQ ókilderimen qatar, ekologtar, blogerler, qoǵam belsendileri qatysty. Qatysýshylarǵa qalanyń sanıtarlyq deńgeıin saqtaýǵa kómektesetin zamanaýı tehnıka tanystyrylyp, kásiporynnyń óndiristik nysany boıynsha ekskýrsııa uıymdastyryldy. Sondaı-aq salalyq mamandar is-shara qonaqtarymen pikir almasty.
Astana – qarqyndy damyp jatqan zamanaýı megapolıs. Munda kún saıyn aýqymdy qurylys júrgiziledi, ınfraqurylymy kúrdelenip, kólik sany artyp jatyr. Bul – qorshaǵan ortaǵa túsetin antropogendik júktemeniń artýyna sebepshi bolyp otyr. Qalanyń tazalyǵy tek kommýnaldyq qyzmetterdiń jumysyna ǵana emes, sonymen birge árbir azamattyń ekologııalyq sanasy men jaýapkershiligine tikeleı baılanysty. Ásirese, qurylys alańdary, ónerkásiptik nysandar men júktemesi joǵary magıstraldar mańynda jaǵdaı kúrdeli.
Baspasóz týry aıasynda «Astana Tazalyq» pen Kásibı tehnologııalar kolledji arasynda ózara yntymaqtastyq týraly memorandýmǵa qol qoıyldy. Bul qujat – sanıtarlyq qyzmet pen qalany abattandyrý salasyna jańa mamandar daıarlaýǵa baǵyttalǵan mańyzdy qadam. Alǵash ret kolledj stýdentterine kásiporyn bazasynda aqyly óndiristik tájirıbeden ótý múmkindigi usynyldy. Aldaǵy ýaqytta bul baǵdarlama keńeıtilip, osyndaı múmkindik basqa da oqý oryndarynyń stýdentterine berilmek.
Qatysýshylar, sondaı-aq, kompanııanyń sıfrlyq baqylaý júıesimen tanysty. Tehnıkalyq baqylaý bóliminiń basshysy Dastan Musabekovtiń aıtýynsha, barlyq tehnıkalarǵa ornatylǵan jańa býyn GPS-navıgasııalar arnaıy mashınalardyń qozǵalysyn da, júrgizýshilerdiń tártibin de naqty ýaqytta baqylaýǵa múmkindik beredi.
«Qazirgi júıe tehnıkanyń qaı jerde ekenin ǵana emes, júrgizýshiniń marshrýttan aýytqýyn, uzaq turyp qalýyn nemese tipti uıyqtap ketkenin de tirkeıdi. Mundaı tehnologııalar tártip pen qaýipsizdikti arttyryp, jumystyń sapasyn da jaqsartady», dedi D.Musabekov.