Qazaqstanda zańsyz gıdter men tirkelmegen sheteldik týroperatorlar el ımıdjine nuqsan keltirip, salyq tólemeı mıllıondaǵan qarjyny kóleńkeli aınalymǵa baǵyttap otyr. Olar halyqaralyq arenada bedelimizge qaýip tóndirýde. Májilis depýtaty, Respublica partııasynyń ókili Ekaterına Smolıakova osy máselege oraı Premer-mınıstr Oljas Bektenovke depýtattyq saýal joldady, dep habarlaıdy Egemen.kz.
Depýtattyń aıtýynsha, bir jyldyń ishinde elimizde kóshi-qon zańnamasyn 106 myńnan astam sheteldik buzǵan. Al sheteldik «ekskýrsovodtardyń» baqylaýsyz kelýi — júıeli problemaǵa aınalǵan.
«Týrısterdi týra áýejaıda qarsy alyp, qonaq úılerden alyp ketip, Qazaqstan naryǵy men salyq júıesin aınalyp ótedi» dedi Smolıakova.
Almaty qalasyndaǵy jaǵdaıǵa erekshe alańdaýshylyq bildirgen depýtat jaqynda Almaty qalasynda ótken dóńgelek ústelde týrızm salasynyń ókilderi kótergen máselege toqtalyp, Úndistan men Pákistannan kelgen stýdentter elimizde zańsyz gıd bolyp jumys isteıtinin, olardyń usynystary kóbine mádenı emes baǵytta órbip jatqanyn aıtty.
«Sheteldik gıdter Qazaqstannyń tarıhyn da, dástúrin de bilmeıdi. Biraq týrısterge sybaılas jemqorlyq, qylmys pen saıasat týraly aqparat berýge daıyn. Bul – jaı ǵana kóleńkeli bıznes emes, bul – aqparattyq qaýip» dedi depýtat.
Smolıakova demalys kúnderi týrıstik baqylaýdyń joqtyǵyna da toqtaldy. Onyń aıtýynsha, týrıstik jáne kólik polısııasy keı jerlerde múlde joq nemese tek jumys kúnderi ǵana qyzmet atqarady. Onyń aıtýynsha, demalys kúnderi, týrıst kóp keletin kezde, baqylaý atymen joq. Bul – jol berýge bolmaıdy.
Máseleni sheshý úshin depýtat myna máselege, ıaǵnı barlyq gıdterge mindetti sertıfıkattaý engizý; elge kirýdi baqylaý úshin bıometrııalyq júıelerdi qoldaný;týrıstik aımaqtardy senimdi basqarýǵa jeke ınvestorlarǵa berý;sheteldik azamattar úshin valıýtalyq shekteýdi alyp tastaý; e-Qonaq júıesine baqylaýdy kúsheıtý; dámhanalardaǵy sanıtarlyq talaptar men taýdaǵy qaýipsizdikti qamtamasyz etýge nazar aýdarý qajettigin alǵa tartty.
Eger de osyǵan nazar aýdaryp, salada tártip ornata alsaq, onda týrızmniń JIО́-degi úlesin 3–4 paıyzǵa jetkizýge bolady.