Memleket basshysynyń tapsyrmasyna sáıkes, elge qaıtarylǵan zańsyz ıemdelgen aktıvter qarajatyn halyqtyń ómir súrý sapasyn arttyrýǵa baǵyttaý jumystary jalǵasyp jatyr. Úkimettiń sheshimimen Arnaýly memlekettik qordan Soltústik Qazaqstan oblysynda sý qubyry ınfraqurylymyn damytýǵa 45 mıllıard teńgeden astam qarjy bólindi, dep habarlaıdy Egemen.kz.
Atalǵan qarajat óńirdegi aýyl turǵyndaryn sapaly aýyz sýmen qamtý maqsatynda júzege asyrylatyn 48 ınfraqurylymdyq jobaǵa baǵyttalady. Olardyń qatarynda Sokolov, Býlaev jáne Presnov toptyq sý qubyrlaryn rekonstrýksııalaý, sondaı-aq Aıyrtaý men Shal aqyn aýdandaryndaǵy eldi mekenderdi Kókshetaý toptyq sý qubyryna qosý úshin jańa sý tartý jelilerin salý jobalary bar.
Jobalar tolyq aıaqtalǵannan keıin Soltústik Qazaqstan oblysynyń aýyl turǵyndary 100 paıyz sapaly aýyz sýmen qamtylady dep josparlanǵan.
Aıta keteıik, qazirgi tańda elimizdegi eń uzyn toptyq sý qubyrlary dál osy óńirde ornalasqan. Jalpy uzyndyǵy 3 myń shaqyrymnan asatyn sý júıeleri arqyly 175 myńnan astam turǵyndy biriktiretin 229 aýyl sapaly aýyz sýmen qamtamasyz etilip jatyr. Oblys ortalyǵy Petropavl qalasynyń turǵyndary 100 paıyz, al aýyldyq eldi mekenderdegi halyqtyń 97,5 paıyzy ortalyqtandyrylǵan sýmen jabdyqtaý qyzmetine qol jetkizgen.
Bul bastama — Memleket basshysynyń ádiletti Qazaqstan qurý jolyndaǵy naqty tapsyrmalarynyń nátıjeli júzege asyrylyp jatqanyn kórsetetin mańyzdy qadam.