IIM arnaıy operasııasynyń nátıjesinde Qarasaı aýdanynan iri kólemdegi sıntetıkalyq esirtki óndirisimen aınalysqan jasyryn zerthana tabylyp, jumysyn toqtatty. Zańsyz aınalymnan mıllıondaǵan dollarǵa baǵalanatyn esirtki zattary tárkilendi, dep jazady Egemen.kz.
Almaty oblysy, Qarasaı aýdanynyń «Turar baqshasy» aýylynda jasyryn sıntetıkalyq esirtki zerthanasynyń jumysy toqtatyldy. Bul – Ishki ister mınıstrliginiń Shý qalasynan bastap júrgizgen «baqylanatyn jetkizý» ádisi arqyly júzege asqan arnaıy operasııasynyń nátıjesi.
Operasııa kezinde kórshi memlekettiń eki azamaty qolǵa tústi. Tergeý derekterine qaraǵanda, olar «mefedron» esirtkisin óndirip, ony taratý maqsatynda áreket etken. IIM Esirtki qylmysyna qarsy is-qımyl komıteti tóraǵasynyń mindetin atqarýshy Danııar Meırhannyń aıtýynsha, tárkilengen 11 kg esirtki 35 myńnan astam dozaǵa teń. Bul kóleńkeli naryqtaǵy baǵamen 1,6 mıllıon dollarǵa para-par.
Zerthanaǵa júrgizilgen tintý kezinde 20 lıtr jáne 115 keli psıhotrop zat, sondaı-aq 2 tonnadan asa prekýrsor tabylǵan. Mamandardyń esebinshe, dál osy shıkizattan taǵy shamamen 120 keli sıntetıkalyq esirtki ázirlenbek bolǵan.
Jalpy alǵanda, kóleńkeli esirtki bıznesine keltirilgen zalal 17,5 mıllıon dollarǵa baǵalanyp otyr. Qazir kúdiktiler ýaqytsha ustaý ızolıatoryna qamalyp, tergeý amaldary jalǵasyp jatyr.