Elimizdegi mektepterdiń 70 paıyzǵa jýyǵy aýylda ornalasqan. Solardyń deni shaǵyn jınaqty bilim oshaqtary sanalady. Osydan eki jyl buryn respýblıka kóleminde qala men aýyl mektepteri arasyndaǵy bilim sapasynyń alshaqtyǵyn azaıtý maqsatynda «Aýyl mektebi – sapa alańy» jobasy bastalǵan edi. Endi osy jobaǵa 2025–2026 oqý jylynda taǵy 1600 aýyl mektebi qosylady dep josparlanyp otyr.
Atalǵan joba aıasynda Aqtóbe oblysynda «Sıfrlyq tehnologııalardy paıdalana otyryp shaǵyn jınaqty aýyl mektepteriniń áleýetin damytý», Almaty oblysynda «Jaratylystaný-matematıkalyq baǵyttaǵy pánder boıynsha bilim berý sapasyn arttyrý», Mańǵystaý oblysynda «Otpan» tirek mektepteriniń jelisin damytý», Ulytaý oblysynda «Ustaz Ulytau» sııaqty óńirlik bastamalar júzege asty.
Dálirek aıtqanda, 2023 jyly Aqtóbe oblysynda 12 tirek mektep pen 134 shaǵyn jınaqty mektep, byltyr Aqmola, Qostanaı, Pavlodar, Batys Qazaqstan jáne Soltústik Qazaqstan oblystarynda taǵy 10 tirek jáne 30 shaǵyn jınaqty mektep jobaǵa qatysty.
Jobany iske asyrýdyń nátıjesinde mektepterdiń materıaldyq-tehnıkalyq bazasy jańartylyp, zamanaýı pándik jáne sıfrlyq kabınettermen jabdyqtaldy. Sondaı-aq jyldamdyǵy joǵary ınternetpen qamtamasyz etý sheshimin tapty.
Jobanyń eń mańyzdysy – onlaın oqytý. Oqýshy men muǵalim sany az aýyl mektepterinde matematıka, fızıka, hımııa, bıologııa jáne aǵylshyn tili pánderinen onlaın sabaqtar ótkiziledi.
«Keıbir aýyl mektepterinde bir muǵalim birneshe pánnen sabaq berip júr. Jańa jobanyń arqasynda tirek mektepteriniń ustazdary shaǵyn jınaqty mekteptegi oqýshylardy onlaın oqytady. Iаǵnı ár pánnen óz isiniń bilikti mamany dáris beredi. Bul balalardyń bilim sapasyn jaqsartyp qana qoımaı, aýyl muǵalimderiniń de kásibı biliktiligin arttyrýǵa múmkindik beredi», dedi Y.Altynsarın atyndaǵy Ulttyq bilim akademııasynyń prezıdenti Nazıpa Aıýbaeva.
Sonymen qatar muǵalimderge sıfrlyq saýattylyq kýrstary oqytylyp, tehnologııalardy qoldaný men oqý baǵdarlamalaryn aýyl mektepterine beıimdeý boıynsha trenıngter ótkizilip, ádistemelik qoldaý kórsetilip otyr.
Búginge deıin osy baǵytta 10-nan astam respýblıkalyq is-shara uıymdastyryldy. Osyndaı jumystar aldaǵy ýaqytta da jalǵasady.
Azat ESEN