AQSh prezıdenti Donald Tramp mys ımportyna jańa 50 paıyzdyq baj salyǵyn engizýdi josparlap otyrǵanyn málimdedi, dep habarlaıdy Egemen.kz CNN telearnasyna silteme jasap.
Alaıda atalǵan salyqtyń naqty qaı ýaqytta kúshine enetini ázirge belgisiz.
Bıyl aqpanda Donald Tramp ulttyq qaýipsizdik múddesine súıene otyryp, mys ımportyna qatysty tergeý júrgizý týraly tapsyrma bergen bolatyn. Atalǵan zań aıasynda Prezıdent keıbir ónimderge joǵary tarıfter engize alady.
Mys — elektronıka, turmystyq tehnıka jáne avtokólik óndirisi úshin mańyzdy shıkizat kózi. Sarapshylardyń pikirinshe, bul bastama AQSh-ta atalǵan ónimderdiń qymbattaýyna ákelýi múmkin. Saýda mınıstrliginiń málimetinshe, ótken jyly Amerıka Qurama Shtattaryna 17 mıllıard dollar kóleminde mys ımporttalǵan.
Aıta keteıik, Tramptyń málimdemesinen keıin Nıý-Iorktegi bırjada mys baǵasy kúrt ósken. Fıýcherstik kelisimder 15 paıyzǵa kóterilip, bir fýnty 5,68 dollarǵa deıin jetken.
Sondaı-aq, Prezıdent farmasevtıkalyq ónimderge 200 paıyzdyq baj salyǵyn engizýdi de josparlap otyrǵanyn jetkizdi. Bul shara otandyq óndiristi yntalandyrý úshin qolǵa alynady. Degenmen, naqty engizilý merzimi keıinge shegerilýi múmkin. Osy oraıda Tramp Amerıkada dári-dármek óndirisin ulǵaıtý qajet ekenin aıtyp, basqa elderge táýeldilikten arylý kerek degen pikir bildirgen.
Buǵan qosa, Donald Tramp jaqynda 1 tamyzǵa josparlanǵan saýda bajdarynyń kúshine ený merzimi keıinge qaldyrylýy múmkin ekenin de joqqa shyǵarmady. Bul týraly ol dúısenbi kúni Izraıl Premer-mınıstri Bınıamın Netanıahýmen Aq úıdegi kezdesýdiń aldynda jýrnalıster suraǵyna jaýap bergende aıtqan.