Qytaıdyń Chýnsın qalasynda Shanhaı yntymaqtastyq uıymy (ShYU) elderi halyqaralyq kınofestıvaliniń saltanatty jabylý rásimi ótti. Bıylǵy festıvalǵa qatysýshy memleketter eki tolyqmetrajdy fılmnen usynyp, negizgi «Altyn kamelııa» baıqaý baǵdarlamasyna qatysty.
«Úzdik akter» atalymy qazaq akteri Baqyt Qajybaevqa «Nabat operasııasy» fılmindegi basty róli úshin berildi.
Akterdiń aıtýynsha, bul – tek óziniń ǵana emes, fılmge jan-tánimen eńbek sińirgen búkil shyǵarmashylyq toptyń jeńisi. Ol shynaıy oqıǵaǵa negizdelgen bul hıkaıany júzege asyrýdyń mańyzyn atap ótip, kórermenge alǵys bildirdi.
Aıta keteıik, «Nabat operasııasy» fılmi 1992 jyly elimizde bolǵan shynaıy oqıǵaǵa negizdelgen. Avtobýstaǵy 30 adamdy kepilge alǵan lańkesterge qarsy quqyq qorǵaý organdarynyń arnaıy operasııasy adam shyǵynynsyz aıaqtalady.
Fılm Sh.Aımanov atyndaǵy «Qazaqfılm» kınostýdııasynda Mádenıet jáne aqparat mınıstrligi men Ulttyq kınony qoldaý ortalyǵynyń qoldaýymen túsirilgen.
Baıqaýǵa usynylǵan ekinshi qazaq týyndysy – rejısser Darhan Tólegenovtiń «Aǵaıyndylar» dramasy. Bul fılm buǵan deıin 15-ten astam halyqaralyq marapatqa ıe bolǵan, onyń ishinde «Oldenburg» halyqaralyq kınofestıvalinde «Spirit of Cinema Award» úldesi bar.
Bıyl qazaq kınosy festıvaldyń fokýs-seksııasyna usynylyp, «Aǵaıyndylar» fılmi arnaıy baǵdarlama aıasynda kórsetildi. Baıqaý baǵdarlamasyn ShYU elderiniń tanymal kınematograftary, toǵyz adamnan quralǵan halyqaralyq qazylar alqasy baǵalady.
Festıval aıasynda kınonaryq uıymdastyryldy. Qazaqstannyń ulttyq stendinde Ulttyq kınony qoldaý ortalyǵy men Sh.Aımanov atyndaǵy «Qazaqfılm» kınostýdııasynyń negizgi kınojobalary usynyldy. Onda 25-ten astam kórkem, derekti jáne anımasııalyq fılmniń treılerleri kórsetildi.
Chýnsındegi ShYU halyqaralyq kınofestıvali gýmanıtarlyq baılanysty nyǵaıtýǵa, tájirıbe almasýǵa, ulttyq kınoóndiristi damytýǵa arnalǵan mańyzdy mádenı alańǵa aınaldy.