Almatydaǵy Azamattyq avıasııa akademııasy mańyzdy halyqaralyq oqıǵanyń alańyna aınaldy. Azamattyq avıasııanyń halyqaralyq uıymy (IKAO) keńesiniń prezıdenti Salvatore Shakkıtanonyń akademııaǵa resmı sapary jahandyq áýe kóligi júıesindegi rólin aıqyndaı túsedi. Sapar barysynda Salvatore Shakkıtano akademııa basshylyǵymen, professorlyq-oqytýshylar quramy jáne stýdentterimen kezdesti, dep habarlaıdy Egemen.kz.
Azamattyq avıasııanyń damytý barysyn joǵary baǵalaǵan ol elimizdiń zamanaýı standarttardy engizýge, tıimdi memlekettik saıasat júrgizýge jáne adamı kapıtalǵa basa kóńil bólgeni úshin alǵysyn bildirdi. Onyń aıtýynsha, avıasııa — bul jaı ǵana ushý emes, adamdardy, mádenıetter men elderdi biriktiretin áleýmettik-ekonomıkalyq damýdyń qýatty quraly.
IKAO basshysy qazirgi álemdik avıasııa aldynda turǵan mańyzdy syn-qaterlerdi de atap ótti: 2050 jylǵa qaraı jolaýshylar sanynyń 12 mıllıardqa deıin ósýi, avıasııalyq oqıǵalardy joıý qajettigi, kómirtekti beıtaraptyq strategııasyn júzege asyrý jáne salanyń shynaıy ınklıýzıvtiligine qol jetkizý, sonyń ishinde áıelder úshin teń múmkindikterdi qamtamasyz etý mindetteri bar.
Sóziniń mańyzdy bóligi áıelderdiń avıasııa salasyna qatysýyna arnaldy. Qazirgi tańda olardyń jahandyq avıasııadaǵy úlesi 5%-dan aspaıdy, al ósim qarqyny baıaý. Degenmen, Shakkıtano myrzanyń aıtýynsha, Qazaqstan bul baǵytta oń nátıjeler kórsetip, genderlik teńdikti ilgeriletýde belsendi ustanym tanytyp otyr.
Akademııada IKAO usynǵan CBTA (quzyrettilikke negizdelgen oqytý) modeline erekshe nazar aýdarylyp keledi. Oqý prosesi pılottardy, dıspetcherlerdi, ınjenerlerdi, sondaı-aq basqarýshy kadrlar men avıasııa salasyndaǵy zertteýshilerdi daıarlaýdy qamtıdy. Oqý baǵdarlamalary ulttyq jáne halyqaralyq standarttarǵa sáıkes keledi, IKAO men IATA akkredıtasııalaryna ıe, ALICANTO jáne TRAINAIR PLUS sııaqty jahandyq bastamalarǵa qatysady jáne sheteldik seriktestermen birlesip avtorlyq kýrstardy ázirleýde.
Rektor Beken Seıdahmetovtiń aıtýynsha, IKAO basshysynyń sapary — bul maqtanysh qana emes, sonymen qatar Akademııanyń halyqaralyq ıntegrasııasyna jáne odan ári damýyna tyń serpin beretin mańyzdy kezeń. Akademııa bilimberý uıymy bolýmen qatar, IKAO-nyń óńirlik seriktesine aınalyp, avıasııalyq bilim berý salasyndaǵy jahandyq bastamalardy júzege asyrýǵa arnalǵan halyqaralyq platforma bolýǵa umtylady.
Sapardyń basty nátıjeleriniń biri — Qazaqstannyń azamattyq avıasııasyn 2050 jylǵa deıin damytý jónindegi buryn qol qoıylǵan master-jospardyń rastalýy boldy. Bul qujat IKAO-men birlesip daıyndalǵan jáne TMD óńiri úshin biregeı tájirıbe bolyp tabylady. Qujattyń negizinde ınfraqurylymdy jańǵyrtý, kadrlar daıarlaý sapasyn arttyrý, sıfrlyq jáne ornyqty sheshimderdi keńinen engizý, sondaı-aq Qazaqstannyń Eýropa men Azııa arasyndaǵy tranzıttik hab retindegi rólin nyǵaıtý basym baǵyttar retinde belgilengen. Bul master-jospar jahandyq úrdister men óńirlik erekshelikterdi eskere otyryp, salany júıeli túrde transformasııalaýǵa negiz qalaıdy.
Búginde Qazaqstan tek halyqaralyq standarttardy qabyldaýshy el ǵana emes, sonymen qatar olardy ázirleýge qatysýshy retinde de ózin tanytyp keledi. Eldi óńirlik quzyret jáne bilim ortalyǵyna aınaldyrý, bilimberý qyzmetterin eksporttaýǵa baǵyttalǵan ǵylymı-bilim berý klasterlerin qurý, halyqaralyq seriktestermen birlesip sıfrlyqjáne sımýlıasııalyq sheshimderdi (vırtýaldy jáne tolyqtyrylǵan shyndyq tehnologııalaryn qosa) engizý, akademııalyq utqyrlyqty keńeıtý jáne jetekshi sheteldik ýnıversıtettermen birlesken baǵdarlamalardy júzege asyrý máseleleri talqylandy.
Sonymen qatar, mamandar daıarlaýdyń jańa tehnologııalyq jaǵdaılarǵa beıimdelýin qamtamasyz etý maqsatynda kadrlyq táýelsizdikti nyǵaıtýǵa, salanyń turaqtylyǵyn arttyrýǵa jáne oqytýdyń jańa bilim berý tehnologııalaryn eńgizýge erekshe kóńil bólinýde. Aǵylshyn tilindegi baǵdarlamalardy damytý, álemniń jetekshi ýnıversıtetterimen ekijaqty kelisimder jáne jahandyq akademııalyq platformalarǵa qatysý – munyń bári turaqty jáne halyqaralyq deńgeıde tanylǵan bilim berý prosesiniń negizin qalaıdy.
Sondaı-aq, azamattyq avıasııa salasyndaǵy halyqaralyq yntymaqtastyqty damytýǵa qosqan eleýli úlesi úshin Azamattyq avıasııa akademııasy IKAO Keńesiniń Prezıdenti Salvatore Shakkıtanoǵa jáne IKAO-nyń Eýropa jáne Soltústik Atlantıka bıýrosynyń (EUR/NAT) О́ńirlik dırektory Nıkolas Ralloǵa «Azamattyq avıasııa akademııasynyń Qurmetti professory» ataǵyn berdi.
IKAO Keńesi Prezıdentiniń Qazaqstanǵa sapary — eldiń qol jetkizgen nátıjelerin halyqaralyq deńgeıde moıyndaýdyń belgisi ǵana emes, sonymen qatar jańa kezeńniń bastaý núktesi. Búginde IKAO men Qazaqstan arasyndaǵy yntymaqtastyq formaldy dıalog sheńberinen shyǵyp, ornyqty avıasııalyq bolashaqqa baǵyttalǵan ózara tıimdi seriktestikke aınalyp keledi.
Azamattyq avıasııa akademııasy ulttyq ári óńirlik deńgeıde avıasııa mamandaryn daıarlaıtyn ortalyq retindegi mártebesin nyǵaıtyp, tek halyqaralyq standarttarǵa saı bolýmen shektelmeı, avıasııalyq bilim berý salasyndaǵy jahandyq kún tártibin qalyptastyrýǵa da óz úlesin qosýdy kózdeıdi.
Almaty