Qazaq ulttyq agrarlyq zertteý ýnıversıtetiniń bazasynda Jibek joly elderiniń Agrarlyq bilim jáne ǵylym salasyndaǵy ınnovasııalar alıansynyń qurylǵanyna 10 jyl tolýyna oraı, dástúrli X jınalysy jáne ShYU memleketteriniń Aýyl sharýashylyǵy ýnıversıtetteri rektorlarynyń IV forýmy ótti.
Is-sharaǵa alıans quramyndaǵy 19 eldiń 120-dan astam joǵary oqý oryndary men ǵylymı mekemelerden 200-den astam delegat qatysty.
Jibek joly elderiniń agrarlyq bilim berý jáne ǵylym salasyndaǵy ınnovasııalar alıansy 2016 jyly Qytaıdyń Soltústik-Batys aýyl sharýashylyǵy jáne orman sharýashylyǵy ýnıversıteti bastamasymen qurylǵan bolatyn. Osy kezeńde alıans halyqaralyq joǵary oqý oryndarynyń bilikti kadrlar daıarlaý salasyndaǵy kúsh-jigerin biriktirý, birlesken bilim baǵdarlamalaryn, ǵylymı zertteýler men agrotehnologııalar transferin damytýǵa kúsh salyp keledi.
Jumysy 2022 jyly bastalǵan ShYU rektorlar forýmy búginde turaqty aýyl sharýashylyǵy, azyq-túlik qaýipsizdigi jáne salany sıfrlandyrý máseleleri boıynsha agrarlyq ýnıversıtetter arasyndaǵy ashyq dıalog formatyndaǵy mańyzdy platformaǵa aınaldy.
«Jibek jolyndaǵy agrarlyq bilim jáne ǵylym salasyndaǵy yntymaqtastyqty tereńdetý – bolashaqtyń aýyl sharýashylyǵyn damytýǵa járdemdesý» taqyrybynda ótken forýmda KazNARU basqarma tóraǵasy-rektor Aqylbek Kúrishbaev agrarlyq ǵylymdy ilgeriletý jáne óńirdi ornyqty damytý úshin óte mańyzdy alań ekenin atap ótti.
«Bıylǵy jyly bizdiń ýnıversıtetimizdiń osyndaı aýqymdy halyqaralyq sharanyń teń uıymdastyrýshysy atanýy – erekshe rámizdik mánge ıe. Bul ýnıversıtettiń akademııalyq ortada tanylýy ǵana emes, sonymen qatar aımaqtaǵy elder arasyndaǵy ǵylym, bilim jáne ınnovasııa salasyndaǵy ıntegrasııany tereńdetýdegi belsendiliginiń eselep óskenin aıǵaqtaıdy. Memleket basshysy Qasym-Jomart Toqaevtyń jýyrda ótken «Ortalyq Azııa – Qytaı» sammıtinde kelesi jyldy «Ǵylym men bilim jyly» dep jarııalaǵan tarıhı bastamasy búgingi jınalysymyzdyń ózektiligi men mańyzdylyǵyn arttyra túspek. Bul sheshim – bilim men ǵylymnyń, tehnologııa men akademııalyq áriptestiktiń aımaqtyq damýdyń qozǵaýshy kúshi retindegi qýatty rólin taǵy da aıǵaqtaıdy. Osy ıgi bastamada kórinis tapqan ıdeıalar – bizdiń alıansymyzdyń mıssııasy men mindetterimen tereń úndesedi. Búgingi tańda aýyl sharýashylyǵy asa kúrdeli kezeń men qarqyndy ózgeristerdi bastan keshirýde. Ol ekonomıkanyń jaı ǵana bir salasy retinde ǵana emes, adamzattyń turaqty damýy men órkendeýiniń, halyqtyń ál-aýqaty men planetanyń ekologııalyq tepe-teńdigi táýeldi bolatyn júıe quraýshy sala retinde jıi qarastyrylýda», dep atap ótti A.Kúrishbaev.
Forýmnyń plenarlyq otyrysynda Jibek joly elderiniń Agrarlyq bilim jáne ǵylym salasyndaǵy ınnovasııalar alıansynyń bas hatshysy, Soltústik-Batys aýyl jáne orman sharýashylyǵy ýnıversıtetiniń rektory, professor Vý Pýte agrarlyq joǵary oqý oryndary bilimniń ǵana emes, ýaqyt talabyna saı ozyq tehnologııalyq sheshimder ortalyǵyna aınalǵanyn atap ótti. Jetekshi agrarlyq ýnıversıtetterdiń mıssııasyn keshendi qoldaný – kúsh biriktirýge, damý baǵyttaryn dál anyqtaýǵa jáne transulttyq ózara yntymaqtastyq úlgileriniń tıimdi modelderin qurýǵa negiz bolady.
ALMATY