Qazirgi zaman ınjenerleri – tek tehnıkany biletin mamandar ǵana emes, olar – kreatıvti oılaıtyn, kúrdeli máselelerdi sheshýge qabiletti, kópsalaly bilimmen qarýlanǵan tulǵalar. Dál osy jańa býyn ınjenerlerin tárbıeleýdi maqsat etken elimizde jańashyl baǵyttaǵy «Keleshek mektepteri» júıesi belsendi damyp keledi. Bul oqý oryndary oqýshylardy erte jastan ınjenerlik oılaýǵa, zamanaýı tehnologııalarmen jumys isteýge baýlıdy.
«Keleshek mektepterindegi» oqytý úderisi – teorııa men praktıkanyń tyǵyz baılanysyna negizdelgen. Jobalyq jáne tájirıbelik sabaqtar arqyly oqýshylar ómirlik máselelerge naqty sheshimder usynyp, óz ıdeıalaryn júzege asyrý múmkindigine ıe. Olardyń synı oılaý qabiletin, shyǵarmashylyq áleýetin, sondaı-aq toppen jumys isteý daǵdylaryn damytady. Oqý baǵdarlamasynda robottehnıka, baǵdarlamalaý, 3D-modeldeý, sıfrlyq tehnologııalar sekildi pánder erekshe oryn alady. Oqýshylar zamanaýı ınnovasııalyq qurylǵylarmen jumys isteýdi úırenedi.
Kókshetaý qalasynyń tehnıkalyq mektep-lıseıi «Keleshek mektepteri» jobasy aıasynda 2025 jyldyń qańtar aıynan bastap ashyldy. Bilim oshaǵynyń materıaldyq-tehnıkalyq bazasy joǵary deńgeıde jabdyqtalǵan. Zerthanalar men STEM kabınetterde oqýshylardyń óz jobalaryn jasaýyna qolaıly jaǵdaı jasalǵan. Balalar óz ıdeıalaryn naqty ónimge aınaldyryp, ónertapqyshtyq daǵdylaryn damyta alady. Qazir mektebimizde robottehnıka, avıamodeldeý úıirmeleri jumys jasap jatyr. Robottehnıka kabınetinde ınteraktıvti panelder, LEGO Education konstrýktorlary, Arduino platformalary, 3D prınterler, sensorlar jáne balalarǵa naqty ınjenerlik jobalardy jasaýǵa múmkindik beretin eń zamanaýı jabdyqtar jınaqtalǵan. Avıamodeldeý úıirmesinde oqýshylar ushý apparattarynyń (ushaq, planer, dron, t.b.) jumys úlgilerin qurastyryp, olardy áýede ushyrý arqyly aerodınamıka, tehnıkalyq qurylym jáne basqarý júıelerin zertteý isimen aınalysyp, tájirıbelik bilim alyp jatyr. Sondaı-aq elimizde osy jyl «Jumysshy mamandyqtary jyly» bolyp jarııalanýyna oraı mektebimizde oqýshylarmen kásiptik baǵdar berý jáne qoldanbaly jumysty damytýǵa basa nazar aýdarý maqsatynda tigin úıirmesi ashyldy. Úıirme qysqa ýaqyt ishinde sán, dızaın jáne qol eńbegi álemine qyzyǵýshylyq tanytatyn paıdaly alańǵa aınaldy. Sabaqtarda oqýshylar tigin isiniń negizderimen tanysyp, ár bala ózin qoldanbaly mamandyqta synap kóre alady, shyǵarmashylyǵyn tanytyp, kásibı bolashaǵyna jol ashady.
Sonymen qatar mektebimizde bilim baǵdarlamalarymen qatar halyqaralyq seriktestikti damytý baǵytynda da aýqymdy jumystar atqarylyp jatyr. Joǵary oqý oryndarymen, ǵylymı zertteý ortalyqtarymen jáne tehnologııalyq kompanııalarmen baılanys ornatý arqyly oqýshylar men muǵalimder kásibı tájirıbege bir taban jaqyndaı tústi. Máselen, jaqynda Túrkııa eliniń «Bahtili Mesleki ve Tehnik Anadoly Lisesi» mektebimen onlaın kezdesý ótti. «Baýyrlas mektepter» jobasy aıasyndaǵy jıyn bilim ordalary arasyndaǵy mádenı jáne bilim tájirıbesin bólisýdiń tıimdi alańyna aınaldy. Almaty qalasyndaǵy Halyqaralyq ınjenerlik-tehnologııalyq ýnıversıtetimen ózara yntymaqtastyq týraly memorandýmǵa qol qoıyldy. Bul kelisim aıasynda birlesken ǵylymı jobalar, sheberlik saǵattary, kásibı baǵdarlaý sharalaryn qoldaý kózdelip otyr. J.Mýsın atyndaǵy Kókshetaý joǵary qazaq pedagogıkalyq kolledjimen de birlesip jumys atqarylyp jatyr. Bul áriptestik – sıfrlandyrý men aqparattyq-kommýnıkasııalyq tehnologııalar aıasynda bilim salasyn ınnovasııalyq turǵydan damytýda mańyzdy ról atqarady. Sonymen qatar sáýir aıynda Joǵary tehnıkalyq kolledji arasynda yntymaqtastyq týraly memorandýmǵa qol qoıyldy. Kelisim birlesken jobalardy júzege asyrýǵa, oqýshylar men stýdentterdiń kásibı baǵdaryn qalyptastyrýǵa, bilim sapasyn kóterýge baǵyttalǵan. Soǵan sáıkes qyrkúıekten bastap mektebimizde mashına jasaý jáne ónerkásiptik robottehnıka baǵyty boıynsha úıirmeler ashý josparlanyp otyr. Bul bilim sapasyn arttyryp qana qoımaı, oqýshylar men muǵalimderdiń kásibı deńgeıin jańa satyǵa kóteredi.
Oqýshylardyń jetistikteri de bilim berý modeliniń nátıjeli ekenin kórsetip otyr. Respýblıkalyq jáne halyqaralyq deńgeıdegi ǵylymı jobalar men olımpıadalarda mektebimizdiń oqýshylary júldeli oryndarǵa ıe bolyp júr. Bizdiń oqýshylar tehnıkalyq bilimdi ǵana emes, sonymen qatar kreatıvti oılaýdy, komandalyq jumysty jáne ǵylymǵa degen qushtarlyqty kórsetip otyr. Atap aıtsaq, oqýshylar Sh.Ýálıhanov ýnıversıtetiniń uıymdastyrǵan «Mektep jáne ýnıversıtet: ǵylymı yntymaqtastyq qyrlary» atty konferensııada 1,2,3 júldeli oryndarǵa, matematıka jáne orys tili pánderinen respýblıkalyq pán olımpıadasynan júldeli 3-orynǵa, matematıka páninen Los-Andjeles (AQSh) qalasynda ótken halyqaralyq «HSEL» olımpıadasynan júldeli 3-orynǵa ıe boldy.
Kókshetaý qalasyndaǵy tehnıkalyq mektep-lıseı – ınjenerlik bilim berýdiń zamanaýı úlgisi. Munda oqýshylardyń shyǵarmashylyq jáne tehnıkalyq qabiletteri damyp, erte kásibı baǵdar alýǵa múmkindik jasalǵan. Halyqaralyq seriktestik pen zamanaýı tehnologııalardy tıimdi qoldaný arqyly teorııa men praktıkany ushtastyrǵan sapaly bilim beriledi. Mundaǵy árbir joba, árbir bastama – elimizdiń bolashaǵyn quratyn jas urpaqtyń jan-jaqty, saýatty ári tehnologııalyq turǵydan damyǵan tulǵa bolyp qalyptasýyna baǵyttalǵan naqty qadam.
Tilegen AMANGELDIULY,
Tehnıkalyq mektep-lıseı dırektory
Kókshetaý